पुण्यात २०२२ मध्ये किडनी प्रत्यारोपणाचा घोटाळा समोर आला होता. या प्रकरणातही ससूनमधील वैद्यकीय अधिकाऱ्यांची नावे समोर आली होती. गेल्या वर्षी विविध प्रकारचे प्रमाणपत्र आणि वैद्यकीय बिलांसाठी लाच घेण्याचे प्रकरण उघडकीस आले होते. अपंगत्वाचं प्रमाणपत्र देण्यासाठी साठ हजार रुपयांची लाच मागितल्याप्रकरणी एका लिपिकाला अटक करण्यात आली होती. गेल्या वर्षी १ ऑक्टोबरला ससून रुग्णालयाच्या परिसरात दोन कोटी रुपयांचे अंमली पदार्थ जप्त करण्यात आले होते. अमंली पदार्थ जप्त केल्यानंतर लगेच दुसऱ्या दिवशी २ ऑक्टोबरला ललित पाटील ससूनमधून पसार झाला. अंमली पदार्थ तस्कर ललित पाटील याला आजारी दाखवून महिनोंमहिने रुग्णालयात दाखल ठेवण्यात आल्याचे या प्रकरणानंतर सिद्ध झाले होते. या प्रकरणात तत्कालीन अधिष्ठाता डॉ. संजीव ठाकूर यांना पदमुक्त तर सहयोगी प्राध्यापक डॉ. प्रवीण देवकाते यांचे निलंबन करण्यात आले होते. यानंतरही तरी ससूनमधील गैरप्रकार थांबतील अशी अपेक्षा होती. मात्र, यानंतरही वैद्यकीय अधीक्षक पद मिळविण्यासाठी वैद्यकीय अधिकाऱ्यांनी एकामेंकावर आरोप-प्रत्यारोप सुरू केले. काही अधिकाऱ्यांनी थेट मुख्यमंत्र्यांना पत्र लिहीले. तर काहींना आमदारांच्या वशिल्याने अधीक्षक मिळविले. गेल्या महिन्यात अधीक्षकांच्या खुर्चीवरून नाट्यमय घडामोडी घडल्या होत्या. या घडामोडींची दखल घेऊन थेट वैद्यकीय शिक्षण विभागाच्या आयुक्तांनी अधीक्षकांची नियुक्ती करण्याचे आदेश काढले होते.
ससूनमध्ये दोन वर्षांत घडलेले गैरप्रकार
– २०२२ : पैसे घेऊन खोटे दिव्यांग प्रमाणपत्र देण्यात येत असल्याचे प्रकरण उघडकीस
– २०२२ : कागदत्रांची सत्यता न तपासता किडनी प्रत्यारोपणाला परवानगी
– २०२३ : अंमली पदार्थ जप्त
– २०२३ : ललित पाटीलसह नऊ कैद्यांची बडदास्त ठेवण्यात येत असल्याचे उघकीस
– २०२३ : ललित पाटील रुग्णालयातून पसार
– २०२३ : मद्य पार्टीचे प्रकरण
– २०२३ : अधीक्षकांचा शिक्का (स्टॅम्प) चोरीला गेला
– २०२३ : लाचलुचपत प्रतिबंधक विभागाचा छापा
– २०२४ : दाखल रुग्णाला उंदीर चावल्याचे प्रकरण
– २०२४ : वैद्यकीय अधीक्षक पदासाठी अंतर्गंत वादाचे प्रकरण उघडकीस
अधिकाऱ्यांचे तोंडावर बोट
गेल्या काही दिवसांपासून वारंवार गैरप्रकार घडत असतानाही ससून प्रशासन आणि वैद्यकीय शिक्षण विभाग कारवाई किंवा अधिकाऱ्यांची बदली का करत नाही? असा प्रश्न अधिष्ठाता आणि वैद्यकीय शिक्षण विभागाच्या अधिकाऱ्यांना विचारला असता त्यांनी बोलण्यास नकार दिला. रक्तगटाच्या नमुन्यांचे फेरफार केल्याच्या प्रकरणाची कोणतीही माहिती नाही. पोलिस प्रशासनाकडून अधिकृत माहिती किंवा पत्र प्राप्त झालेले नाही. त्यामुळे यावर बोलता येणार नाही, असे अधिकाऱ्यांनी सांगितले.