काय आहे प्रकरण?
बालेवाडी भागात राहणाऱ्या ५४ वर्षीय महिलेने चतु:शृंगी पोलिस ठाण्यात तक्रार दिली आहे. तक्रारदार महिलेला सायबर चोरट्यांनी ‘स्टॉक व्हेनगार्ड’ कंपनीच्या नावे संदेश पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष चोरट्यांनी दाखविले होते. चोरट्यांनी महिलेला पैसे गुंतवणूक करण्यास सांगून, एका व्हॉट्सअ‍ॅप ग्रुपमध्ये सहभागी करून घेतले. त्यानंतर महिलेकडून वेळोवेळी पैसे घेतले. महिलेने चोरट्यांना तीन महिन्यांत ४१ लाख ७४ हजार रुपये पाठवले. सुरुवातीला गुंतवणुकीवर चांगला परतावा मिळाला. त्यानंतर चोरट्यांनी परतावा दिला नाही. तेव्हा आपली फसवणूक झाल्याचे लक्षात आल्याने महिलेने पोलिसांकडे तक्रार दिली. याच पद्धतीने सायबर चोरट्यांनी शेअर मार्केटमध्ये गुंतवणुकीच्या आमिषाने बाणेर भागातील एका ज्येष्ठ नागरिकाची ३० लाख रुपयांची फसवणूक केल्याचे उघडकीस आले आहे. ७४ वर्षीय नागरिकाने चतु:शृंगी पोलिस ठाण्यात तक्रार दिली आहे. त्यावरून गुन्हा दाखल करण्यात आला आहे.
तिसरी घटना हडपसर परिसरात राहणाऱ्या ६६ वर्षीय व्यक्तीच्या बाबतीत घडली आहे. सायबर चोरट्यांनी तक्रारदाराला एका व्हॉट्सअ‍ॅप ग्रुपमध्ये सहभागी करून घेतले. त्यानंतर गुंतवणुकीवर चांगल्या परताव्याची विविध आमिषे दाखवली आणि गुंतवणूक करण्यास भाग पाडले. त्यानुसार तक्रारदाराने सायबर चोरट्यांनी सांगितलेल्या विविध बँक खात्यांवर १० लाख ९० हजार रुपये पाठवले. मात्र, त्यावर त्यांना कोणताही परतावा मिळाला नाही.
शेअर मार्केट ‘अ‍ॅप’ची माहिती घ्या
‘शेअर मार्केटचे अँड्राइड अ‍ॅप मोठ्या संख्येने कार्यरत आहेत. सायबर चोरटे नागरिकांना विविध प्रलोभने दाखवून फसवणूक करतात. ते नागरिकांना काही ‘फेक अ‍ॅप’ डाउनलोड करायला सांगतात. त्याद्वारे नागरिकांची फसवणूक केली जाते. त्यामुळे नागरिकांनी कोणतेही अ‍ॅप मोबाइलमध्ये डाउनलोड करण्यापूर्वी त्याची अधिकृत माहिती घ्यावी, सत्यता पडताळावी,’ असे आवाहन सायबर पोलिसांनी केले आहे.