काय आहे प्रकरण?
अनेक वर्षापासून टूर्स आणि ट्रॅव्हल्सच्या व्यवसायात असलेल्या इरफानला फेसबुकवर आफरिन खान नाव असलेल्या तरुणीची फ्रेंड रिक्वेस्ट आली. प्रोफाइलवर सुंदर चेहरा पाहून त्याने रिक्वेस्ट स्वीकारली. यानंतर फेसबुक, इन्स्टाग्रामवर दोघेही तासनतास चॅटिंग करू लागले. त्यानंतर मोबाइल क्रमांकाची देवाणघेवाणही झाली. मात्र मोबाइलवर बोलणे कमी आणि व्हॉटसॲपच्या माध्यमातून चॅटिंगचे प्रमाण अधिक असे. इरफान जाळ्यात अडकल्याचे पाहून या भामट्याने पैशांची मागणी करण्यास सुरुवात केली. सुरुवातीला या भामट्याने कॉलेजच्या फीचे कारण सांगितले आणि तीन हजार रुपयांची मागणी केली. इरफानने क्षणाचाही विलंब न करता पैसे पाठविले. चांगली मैत्री झाल्याचे पाहून इरफान तिला भेटायला बोलवू लागला मात्र ‘ती’ भेटणे टाळत होती.
भेटण्यास टाळाटाळ करीत असल्याने संशय …
लग्नाचे वय झाल्याने इरफानने ‘आफरिन’ला लग्नाची मागणी घातली आणि तिनेदेखील लगेच होकार दिला. तिच्या होकारामुळे दोघांमधील जवळीक आणखी वाढली. त्यानंतर कधी घरदुरुस्तीचे कारण तर कधी अन्य कारणे पुढे करून ‘आफरिन’ इरफानकडे पैशाची मागणी सुरूच ठेवली आणि त्यानेदेखील तिच्या कारणांवर विश्वास ठेवत सुमारे सात लाख रुपये तिला पाठविले. इतके पैसे देऊनही ‘आफरिन’ भेटण्यास टाळाटाळ करीत असल्याने इरफानला संशय आला. त्याने अन्य मित्रांना याबाबत सांगितले असता हा फसवणुकीचा प्रकार असल्याचे मित्रांनी त्याला सांगितले. आपण हनी ट्रॅपमध्ये अडकल्याचे लक्षात येताच इरफानने लोकमान्य टिळक मार्ग पोलिस ठाण्यात तक्रार केली.
—————
दुसरी घटना- गुंतवणूकदारांची कोट्यवधींची फसवणूक
मुंबई : कंपनीमध्ये गुंतवणूक केल्यास सात ते दहा टक्के व्याजासह परतावा देण्याचे प्रलोभन दाखवून सुमारे दीडशेपेक्षा अधिक गुंतवणूकदारांची फसवणूक केल्याचा प्रकार समोर आला आहे. याप्रकरणी आर्थिक गुन्हे शाखेने गुन्हा दाखल करून फरार असलेला मुख्य सूत्रधार वेंकटरमनन गोपालन याला अटक केली आहे. त्याने आणि त्याच्या साथीदारांनी सुमारे २० कोटींपेक्षा अधिक रकमेची अफरातफर केली आहे.