सध्या शाळा-महाविद्यालयांना सुट्टी असल्यामुळे मुंबईतील मॉलमध्ये बरीच गर्दी होत आहे. अनेक मॉलमध्ये छोटे-मोठे गेमिंग झोनही आहेत. त्यामुळे खबरदारी म्हणून मुंबई अग्निशमन दलाने मॉलमधील अग्निसुरक्षा तपासणी करण्याचा निर्णय घेतला आहे. मुंबईत सध्या ६९ मॉल आहेत. यातील ६६ मॉलची सुरक्षा तपासणी हाती घेण्यात आल्याची माहिती मुख्य अग्निशमन दल अधिकारी (अतिरिक्त कार्यभार) संतोष सावंत यांनी दिली. साधारण पाच ते सहा महिन्यांपूर्वीच या मॉलची तपासणी केली होती. मात्र राजकोट येथे गेमिंग झोनला लागलेली आग पाहता पुन्हा सुरक्षा तपासणी मोहीम राबवण्याचा निर्णय घेतल्याचे ते म्हणाले.
सुरक्षा यंत्रणांसह मॉलमधील येण्या-जाण्याचे मार्ग यासह अन्य बाबींचा तपास केला जाणार असल्याचे त्यांनी स्पष्ट केले. ६९ मॉलपैकी भांडुपमधील ड्रीम मॉल आणि मुंबई सेन्ट्रल येथील सिटी सेंटर मॉल बंद आहे. तर, अन्य एका मॉलचे काम सुरू आहे. त्यामुळे ६६ मॉलमधील अग्निसुरक्षा तपासणी होणार आहे. याशिवाय मुंबईतील रेस्टॉरण्ट अँड बार तसेच ऑर्केस्ट्रा बारचीही तपासणी लवकरच केली जाणार आहे. यासंदर्भात मुंबई पोलिसांनी पालिकेला पत्रही दिले आहे. त्यानंतर अग्निशमन दलाने २४ पैकी ११ वॉर्डमधील रेस्टॉरण्ट अँड बार तसेच ऑर्केस्ट्रा बारची यादी तयार केली असून ती महापालिकेकडे पाठवली असल्याची माहिती सावंत यांनी दिली.
दरम्यान, शनिवारी सायंकाळी घडलेल्या या भीषण आग दुर्घटनेत उन्हाळ्याच्या सुट्टीचा आनंद लुटणाऱ्या १२ वर्षांखालील चार मुलांसह २७ जणांचा मृत्यू झाला असून, तीन जण जखमी झाले आहेत. राजकोट जळीतकांडाप्रकरणी पोलिसांनी या ‘गेमिंग झोन’च्या सहा भागीदारांविरोधात गुन्हा दाखल केला असून, दोघांना अटक केली आहे. युवराजसिंग सोलंकी आणि नितीन जैन अशी त्यांची नावे आहेत. ‘या गेम झोनला रस्ते व इमारत विभागाकडून परवानग्या मिळाल्या होत्या. अग्निशमन ना-हरकत प्रमाणपत्रासाठी त्यांच्याकडून अग्निसुरक्षा उपकरणांचा पुरावा सादर करण्यात आला होता, मात्र त्याबाबतची प्रक्रिया पूर्ण झाली नव्हती. गेम झोनमध्ये अग्निसुरक्षा उपकरणे होती. मात्र, आग आटोक्यात आणण्यासाठी केलेल्या उपाययोजना पुरेशा नव्हत्या. त्यामुळेच शनिवारी ही दुर्घटना घडली,’ असे पोलिसांनी सांगितले.