पिंपरी-चिंचवड शहरात पिंपरी, भोसरी, चिंचवड येथे ‘एमआयडीसी’ आहेत. या ‘एमआयडीसीं’मध्ये हजारो लहान-मोठे उद्योग आहेत. त्यामध्ये रसायन, रंग अशा विविध प्रकारच्या उद्योगांचा समावेश आहे. या उद्योगांमधून दररोज शेकडो किलो घातक कचरा निर्माण होत आहे. रासायनिक पदार्थ, ज्वलनशिल पदार्थ, विषारी घटक असणारे, हवेत पसरणाऱ्या पदार्थांचा यामध्ये समावेश आहे. महापालिका आणि ‘एमआयडीसी’कडून या उद्योगांना विविध प्रकारच्या सुविधा पुरविल्या जातात. गेल्या अनेक वर्षांपासून शहरातील ‘एमआयडीसीं’मध्ये निर्माण होणाऱ्या घातक कचऱ्याकडे महापालिका; तसेच इतर यंत्रणांनी दुर्लक्ष केले आहे. या घातक कचऱ्यामुळे परिसरात प्रदूषण होत आहे; तसेच या कचऱ्यामुळे एखादी दुर्घटनाही होण्याची शक्यता आहे.
महापालिका उचलते फक्त ओला, सुका कचरा
पिंपरी-चिंचवड महापालिकेकडून ‘एमआयडीसीं’मधील ओला आणि सुका कचरा उचलला जातो. काही वर्षांपूर्वी ‘एमआयडीसी’मध्ये ठिकठिकाणी कचऱ्याचे कंटेनर ठेवले जात असत. मात्र, स्वच्छ शहर सर्वेक्षणात महापालिकेने सहभाग घेतल्यापासून महापालिकेने हे कंटेनर हटविले आहेत. आता महापालिकेच्या आरोग्य विभागाची गाडी येऊन ओला, सुका कचरा गोळा करते. त्यानंतर एका ठिकाणी या कचऱ्याचे विलगीकरणही केले जाते. मात्र, हे करताना महापालिकेचे कर्मचारी घातक कचरा बाजूला करतात. महापालिकेकडून घातक कचरा उचलला जात नाही.
रांजणगाव येथे घातक कचरा प्रक्रिया प्रकल्प
शहरात घातक कचऱ्यावर प्रक्रिया करण्याचा कोणत्याही प्रकल्प नाही. घातक कचऱ्यावर प्रक्रिया करण्याचा प्रकल्प रांजणगाव ‘एमआयडीसी’ येथे आहे. महापालिकेने पिंपरी, चिंचवड, भोसरी या ‘एमआयडीसीं’तील कारखानदारांना या प्रकल्पामध्ये घातक कचरा देण्याचे अवाहन केले आहे. मात्र, हा प्रकल्प लहान स्वरूपात असून, कचरा उचलण्याची यंत्रणा त्यांच्याकडे नाही; तसेच या प्रकल्प व्यवस्थापकांबरोबर कचरा उचलण्याचे कोणतेही धोरण महापालिकेने ठरवून दिलेले नाही.
घातक कचऱ्याचा प्रश्न अनेक वर्षांपासून प्रलंबित आहे. शहरातील ‘एमआयडीसीं’मधील घातक कचरा उचलण्याबाबत महापालिकेकडे अनेकदा मागणी केली आहे. मात्र, महापालिकेकडून केवळ ओला, सुका कचरा उचलला जातो. घातक कचरा उचलण्यासंदर्भात महापालिकेने आपली यंत्रणा सुरू करायला हवी.- संदीप बेलसरे, अध्यक्ष, पिंपरी-चिंचवड लघुउद्योजक संघटना
घातक कचऱ्याची विल्हेवाट लावण्याची जबाबदारी संबंधित कारखानदार, उद्योगांची आहे. महापालिका ‘एमआयडीसी’मधील ओला, सुका कचरा दररोज उचललते. घातक कचरा उचलण्याची जबाबदारी संबंधित उद्योगांची आहे. या उद्योगांनी घातक कचऱ्याची योग्य विल्हेवाट लावावी.- विजयकुमार खोराटे, अतिरिक्त आयुक्त, महापालिका