याप्रकरणी पोलिसांनी अल्पवयीनवर गुन्हा दाखल करत त्याला अटक केली. मात्र, १५ तासांच्या आत अत्यंत आश्चर्यकारक अटींवर त्याला जामीन मंजूर करण्यात आला. त्याला या प्रकरणावर निबंध लिहण्याची आणि १५ दिवस ट्राफिक पोलिसांसोबत काम करण्याची शिक्षा देण्यात आली. त्यानंतर पुण्यातील वातावरण तापलं, नागरिकांनी यावर संताप व्यक्त केला. प्रकरण वाढताना पाहून राज्याचे गृहमंत्री देवेंद्र फडणवीस यांनी याप्रकरणाचा गांभीर्याने तपास करण्याच्या तसेच, दोषींवर कडक कारवाईचे निर्देश दिले. त्यानंतर पुणे आयुक्तांनीही याप्रकरणी दोषींवर कारवाई करण्यात येईल, तसेच कोर्टाच्या निर्णायाविरोधात जिल्हा न्यायालयात याचिका दाखल करणार असल्याचं सांगितलं.
या प्रकरणात कलम ३०४ अंतर्गत गुन्हा दाखल करण्यात आला आहे. कोर्टात याचिका दाखल करण्यात आली आहे की, त्याच्यावर अल्पवयीन म्हणून नाही तर वयस्क म्हणून खटला चालवण्यात यावा. कोर्टाने ही याचिका फेटाळली आहे. त्याविरोधात जिल्हा न्यायालयात याचिका दाखल करण्यात येईल आणि न्यायालयाचया आदेशानुसार कारवाइ केली जाईल, असं पुणे आयुक्त अमितेश कुमार यांनी सांगितलं.
पाहा या घटनेचा धडकी भरवणारा व्हिडिओ
समोर आलेल्या व्हिडिओमध्ये दिसत असल्याप्रमाणे, अश्विनी आणि अनिस हे दुचाकीवर पबसमोरील रस्ता क्रॉस करतात, तेवढ्यात भरधाव वेगात ही पोर्शे कार येते आणि त्यांना मागून धडक देते. ही धडक इतकी जबर होती की अश्विनी काही फूट वर उडाली आणि मग जमिनीवर आदळली, यात तिच्या डोक्याला मोठी दुखापत झाली आणि तिचा जागीच मृत्यू झाला. तर अनिस हा दुचाकीसोबत फरपटत गेला. त्याच्याही डोक्याला मार लागला आणि उपचारादरम्यान त्याचा मृत्यू झाला. यानंतर उपस्थित नागरिकांनी अल्पवयीन कार चालकाला चांगलाच चोप दिला आणि त्याला पोलिसांच्या हवाले केलं. पण, कोर्टाने त्याना अत्यंत आश्चर्यकारक अशा अटींवर जामीन मंजूर केला.
अल्पवयीन दारु प्यायला होता
अल्पवयीनला कार दिल्या प्रकरणी त्याच्या वडिलांवर तसेच दारु दिलेल्या कोझी बार मालक आणि मॅनेजरवर गुन्हा दाखल करण्यात आला असून त्यांना अटक करण्यात आली आहे. त्याने दारु प्यायली होती हे सीसीटीव्ही फुटेजवरुन स्पष्ट झालं आहे. तर ज्या कारने अपघात झाला ती कार त्याच्या वडिलांच्या नावावर होती. त्यावर नंबर प्लेटही नव्हती.