पोलिसांच्या तपासानुसार, आरोपीच्या आईचे रक्त घेण्यात आले त्यावर अल्पवयीन मुलाच्या नावाचे लेबल होते. पोलिसांनी सांगितलं की, आम्हाला आता शंका आहे की या रक्ताच्या नमुन्यात तीन लोकांच्या रक्ताच्या नमुन्यांचे मिश्रण आहे. सध्या या नमुन्यांची ओळख पटवण्याचा प्रयत्न सुरु असल्याचं, गुन्हे शाखेच्या अधिकाऱ्याने सांगितले.
शुक्रवारी गुन्हे शाखेच्या अधिकाऱ्यांनी वॉर्ड नंबर ४० मध्ये उपस्थित असलेल्या सहा कनिष्ठ डॉक्टर आणि नर्सिंग स्टाफचे जबाब नोंदवले. हे सर्व तेव्हा तिथेच उपस्थित होते जेव्हा डॉ. श्रीहरी हळनोर यांनी अल्पवयीन मुलाच्या रक्ताच्या नमुन्यांची अदलाबदल केली. या सहाही जणांना अपघात प्रकरणात साक्षीदार करण्यात आल्याचे अधिकाऱ्यांनी सांगितले.
अल्पवयीन मुलाचे रक्त गोळा करून कंटेनरमध्ये ठेवण्याऐवजी सिरिंजमध्ये ठेवण्यात आले होते, असे गुन्हे शाखेच्या अधिकाऱ्याने सांगितले. ती सिरिंज कुठे आहे हे माहित नाही, जिथे हे सारं घडलं तिथे सीसीटीव्ही नव्हता, अशीही माहिती आहे.
डॉ. अजय तावरेने चौकशीदरम्यान विशाल अगरवालकडून किती पैसे घेतले याबाबत काहीही सांगितले नाही, पोलिसांना संशय आहे की त्याने विशाल अगरवालकडे पैशांच्या बदल्यात आणखी काही घेतलं असावं.
फरार शिवानी अगरवालला अटक
पोर्शे अपघात प्रकरणातील अल्पवयीन आरोपीच्या फरार आईला अखेर पोलिसांनी अटक केली आहे. रक्ताच्या नमुन्यात फेरफार आणि डॉक्टरांना लाच देण्याप्रकरणी शिवानी अगरवालला पुणे पोलिसांच्या गुन्हे शाखेने अटक केली आहे. तर वडील विशाल अगरवाल आणि आजोबा सुरेंद्र अगलवाल हे आधीच पोलिसांच्या ताब्यात आहेत.