कुठलाही राजकीय वारसा नाही, भाजपशी एकनिष्ठेचं फळ
पिंपरी-चिंचवड शहरामध्ये अमित गोरखे यांचे वलय आहे. त्यांना कुठलाही राजकीय वारसा नाही. सुरुवातीपासूनच भाजपशी एकनिष्ठ गोरखे राहिलेले आहेत. याशिवाय देवेंद्र फडणवीस यांचे निष्ठावंत म्हणून त्यांची ओळख देखील आहे. अमित गोरखे हे अण्णाभाऊ साठे महामंडळाचे माजी अध्यक्ष आहेत. याशिवाय त्यांनी मातंग समाजाचे महाराष्ट्राचे उच्चशिक्षित युवा नेतृत्व म्हणून देखील काम केलेले आहे.
पिंपरी-चिंचवड क्षेत्रात नोव्हेल शिक्षण संस्थेचे संस्थापक अध्यक्ष म्हणून त्यांची ओळख आहे. याशिवाय, अनुसूचित जातीतील शैक्षणिक कार्यासाठी त्यांचा भारत सरकारच्या वतीने राष्ट्रीय युवा पुरस्कार देऊन राष्ट्रपतींच्या हस्ते सन्मानित देखील त्यांना करण्यात आले आहे. राष्ट्रीय स्वयंसेवक संघाशी त्यांची लहानपणापासूनच नाळ जोडलेले आहे.
पेपर विक्रेता ते विधान परिषद सदस्य
एक न्यूज पेपर विक्रेता ते विधान परिषद सदस्य पदासाठीचा त्यांचा प्रवास राहिलेला आहे. सध्या त्यांच्यावर भाजपकडून प्रदेश सचिव तसेच पिंपरी विधानसभा निवडणूक प्रमुख अशा जबाबदाऱ्या आहेत. अमित गोरखे यांना उमेदवारी जाहीर झाल्याने पिंपरी चिंचवड भाजपमध्ये आनंदाचे वातावरण आहे. यापूर्वी भाजपकडून चिंचवडला तीन आमदार मिळालेले आहेत. त्यातच गोरखे यांना उमेदवारी मिळाल्याने चौथा आमदार देखील मिळणार आहे. त्यामुळे भाजपची ताकद पिंपरी चिंचवड शहरात वाढणार आहे.
केंद्रीय भाजपकडून कोणत्याही गटातटाच्या राजकारणात न पडता अमित गोरखे यांना उमेदवारी दिल्याने येणाऱ्या विधानसभेची गणिते बसवणे भाजपला सोपे जाणार आहे.
अमित गोरखे हे स्थानिक राजकारणात नेहमी सक्रिय असतात. त्यामुळे त्यांच्या उमेदवारीचा भाजपला कितपत फायदा होतो. येणाऱ्या काळातच पाहायला मिळणार आहे. त्यांच्या निवडीने पिंपरी-चिंचवड भाजपमध्ये आनंदाचे वातावरण आहे.