वनाझ ते रामवाडी आणि पिंपरी-चिंचवड ते सिव्हील कोर्ट दरम्यान सध्या मेट्रोची सेवा सुरू आहे. मार्गांचा विस्तार झाल्यानंतर ‘मेट्रो’च्या प्रवासीसंख्येत सातत्याने वाढ होत आहे. सध्या दररोज साधारणत: ८० हजारांहून अधिक प्रवासी ‘मेट्रो’तून प्रवास करीत आहेत. अधिकाधिक प्रवाशांना आकर्षित करण्यासाठी ‘मेट्रो’कडून अगदी सुट्टीच्या दिवशीही विविध सवलती देण्यात येत आहेत. याशिवाय ऑनलाइन तिकिटे काढणाऱ्यांनाही विशेष सवलती देण्यात येत आहेत.
दैनंदिन पासची होती मागणी
‘पुणे महानगर परिवहन महामंडळा’च्या (पीएमपी) बसप्रमाणेच ‘मेट्रो’तही दैनंदिन पास असावा, अशी मागणी प्रवाशांकडून करण्यात येत ती. या पार्श्वभूमीवर आता ‘महामेट्रो’नेही ‘पीएमपी’चा कित्ता गिरवत त्यानुसार महामेट्रोने देखील प्रवाशांसाठी दैनंदिन पासची सुविधा देऊ केली आहे.
दिवसभर प्रवासाची हमी
शंभर रुपयांचा पास काढल्यानंतर प्रवाशांना दिवसभर ‘मेट्रो’तून फिरता येणार आहे. या सुविधेचा लाभ कामाच्या निमित्ताने दिवसभर शहराच्या विविध भागात फिरणाऱ्या प्रवाशांना होणार आहे. सुट्टीच्या दिवशी अथवा अन्य वेळी दैनंदिन पास सुविधेमध्ये कोणतीही सवलत मिळणार नसल्याचे ‘महामेट्रो’तर्फे सांगण्यात आले आहे.
सुविधा नेमकी कशी?
– दैनंदिन पासचे शुल्क १०० रुपये.
– सकाळी सहा ते रात्री दहा दरम्यान या पासवर प्रवास करता येईल.
– मेट्रोच्या दोन्ही मार्गांवर प्रवासी अमर्यादित प्रवास करू शकतील.
– एका मेट्रो स्थानकात कितीही वेळा प्रवेश करण्याची मुभा.
– दैनंदिन पास शुल्कामध्ये अन्य कोणतीही सवलत नाही.
– एकदा पास काढल्यानंतर रक्कम परत मिळणार नाही.
सिव्हिल कोर्ट ते स्वारगेट मेट्रो कधी?
सिव्हिल कोर्ट ते स्वारगेट या मार्गाचे काम पूर्ण झाले आहे. या ठिकाणी भूमिगत मेट्रोची चाचणी दोन महिन्यांपूर्वी घेण्यात आली होती. लोकसभा निवडणुकीच्या निकालानंतर हा मार्ग ‘महामेट्रो’कडून सुरू केला जाण्याची शक्यता आहे. हा मार्ग सुरू झाल्यावर मुळा-मुठा या नद्यांच्या खालून भूमिगत मार्गातून पुणेकरांना मेट्रोप्रवासाचा आनंद घेता येणार आहे.