याबाबत प्रत्यक्षदर्शींनी दिलेली माहिती अशी की, सोमवारी सायंकाळच्या सुमारास पिंपरी चिंचवड येथे डॉक्टर चालकाने भरधाव वेगात कार चालवून रस्त्यावरून जाणाऱ्या तिघांना उडवले. त्यानंतर त्या कारने टपरीला जोरात धडक दिली. या अपघातात एक व्यक्ती चाकाखाली आल्याचे प्रत्यक्षदर्शींनी सांगितले. या भीषण अपघाताला दीड तास उलटला तरी पोलिसांना काहीच कल्पना नव्हती, अशीही माहिती समोर येत आहे.
या घटनेमुळे पिंपरी चिंचवड शहरात एकच खळबळ उडाली आहे. पुणे आणि जिल्ह्यात दिवसेंदिवस अपघाताच्या घटना वाढत आहेत. त्यात नागरिकांना चिरडले जाऊन त्यांना जीव गमवावा लागत आहे. आंबेगाव तालुक्यात आमदाराच्या पुतण्याने दोघांना चिरडले असल्याची घटना ताजी असताना आज पिंपरी चिंचवड शहरात पुन्हा हिट अँड रनची घटना घडल्याने एकच खळबळ उडाली आहे.
पुण्यात पोर्शे कारच्या घटनेने पुणे हादरले होते. तेव्हापासून हिट अँड रनची प्रकरणे वाढत आहे. पिंपरी चिंचवडमधील अपघातात सुदैवाने कुणीही मृत झाल्याची माहिती समोर आलेली नाहीये. मात्र कारचा वेग एवढा भीषण होता की, प्रत्यक्षदर्शीही काळजाचा ठोका चुकल्याचे सांगत आहेत.