पंकजा मुंडे यांना दिल्लीहून बोलावणं आलं आहे. पंकजा मुंडे सकाळीच तातडीने रवाना झाल्या. लोकसभा निवडणुकीत विजयी झालेल्या पियुष गोयल, उदयनराजे भोसले, नारायण राणे यासारख्या उमेदवारांच्या राज्यसभा जागा रिक्त होणार आहेत. पंकजा मुंडेंना राज्यसभा देऊन मंत्रिमंडळात समावेश केला जाण्याची शक्यता आहे. एनडीएच्या बैठकीचं दिल्लीत आयोजन करण्यात आलं आहे. यावेळी पंकजांबाबतीत मोठी घडामोड समोर येणं अपेक्षित आहे.
पंकजा मुंडे यांचा संसदीय राजकारणातील प्रवास काहीसा खडतर झाल्याचं पाहायला मिळालं. कारण बीड लोकसभा मतदारसंघातून महायुतीतर्फे भाजप उमेदवार असलेल्या पंकजा मुंडे यांना पुन्हा एकदा पराभवाचा धक्का बसला. महाविकास आघाडीतर्फे राष्ट्रवादी काँग्रेस : शरदचंद्र पवार पक्षाचे उमेदवार बजरंग सोनवणे यांनी पंकजा मुंडेंना पराभवाची धूळ चारली.
सुरुवातीपासूनच बीडमध्ये ‘कांटे की टक्कर’ पाहायला मिळाली. मतमोजणीच्या पहिल्या फेरीपासून बजरंग सोनवणे यांनी आघाडी घेतली. मात्र, त्यानंतर पंकजा मुंडे यांनी आघाडी घेऊन ती सत्तावीसाव्या फेरीपर्यंत कायम ठेवली होती. मात्र अठ्ठावीसाव्या फेरीत सोनवणे यांनी सात हजार मतांची आघाडी घेतली. बजरंग सोनवणे यांनी मुंडे यांचा ७ हजारहून अधिक मतांनी पराभव केला. शेवटच्या फेरीपर्यंत पंकजा मुंडेंना अटीतटीची लढत द्यावी लागली होती.
Narendra Modi : तिसरे मोदीपर्व सुरु होणार! 8 चा शुभयोग नाही, मोदींच्या शपथविधी सोहळ्यासाठी नवा मुहूर्त ठरला
२०१९ च्या विधानसभा निवडणुकीत परळी विधानसभा मतदारसंघातून बंधू धनंजय मुंडे यांच्याकडून झालेल्या पराभवानंतर पंकजांना लोकप्रतिनिधित्व करण्याची संधी मिळालेली नाहीच. दोन वेळा खासदार राहिलेल्या बहीण प्रीतम मुंडे यांचा पत्ता पक्षाने कट करुन पंकजांना तिकीट दिले, ते राखण्यात पंकजांना यश आलेले नाही.
Read Latest Maharashtra News Updates And Marathi News
दरम्यान, लोकसभा निवडणुकीत ज्यांनी ज्यांनी प्रयत्न केले, अथक परिश्रम घेतले, कुठल्याही गोष्टीची अपेक्षा न ठेवता काम केले त्या सर्वाचे भाजपच्या राष्ट्रीय सचिव पंकजा मुंडे यांनी मनापासून आभार मानले आहेत. पुढील आठवड्यात पूर्ण जिल्हाभरात आभार दौरा करणार असल्याचे त्यांनी सांगितले आहे. सर्वच्या सर्व ११ तालुक्यांत जावून मतदारांची भेट घेऊन त्यांचे आभार मानणार असल्याचे त्यांनी म्हटले आहे.