छत्रपती शिवाजी महाराज टर्मिनसच्या परिसरातून गेट वे ऑफ इंडियाला भेट देण्यासाठी प्रवाशांची मोठी गर्दी असते. टर्मिनस परिसरातील थांब्यावरून वातानुकूलित बेस्ट बस सुटतात. मात्र अनेकांना त्याची माहिती नसते. त्यामुळे बेस्ट आगाराच्या दोन्ही बाजूने उभ्या असलेल्या शेअर टॅक्सीचा पर्याय स्वीकारला जातो. याच परिसरात मीटर टॅक्सीउपलब्ध असतात. मात्र शेअर टॅक्सी बसच्या तुलनेत जलद प्रवास घडवते आणि मीटर टॅक्सीच्या तुलनेत कमी रुपये आकारत असल्याने प्रवाशांचा शेअर टॅक्सीकडे ओढा अधिक आहे.
सध्या या शेअर टॅक्सीमध्ये स्टूल ठेवून जादा प्रवासी घेतले जातात. ओम्नी गाडीच्या शेअर टॅक्सीची क्षमता सहा प्रवासी अधिक एक चालक अशी आहे. मागे तीन मध्यभागी दोन आणि चालकाच्या बाजूला एक अशी रचना टॅक्सीमध्ये आहे. मात्र सीएसएमटी परिसरातील टॅक्सी चालक मध्यभागी दोन आसनालगत फायबरचा स्टूल ठेवून त्यावरून प्रवासी वाहतूक करतात. स्टूलवरील प्रवासावर प्रवाशांनी हरकत घेतल्यास शेअर टॅक्सीचालकांकडून अरेरावी करण्यात येते.
टॅक्सी चालकाकडून भाडे नाकारणे अशा तक्रारींवर कारवाई करताना बेकायदा प्रवासी वाहतूक, स्टूलवरील वाहतूक यावर ही आरटीओ प्रशासनाने कारवाई करावी, अशी मागणी पर्यटक प्रवाशांकडून करण्यात येत आहे.
‘नियम लागू नाहीत का?’
सीएसएमटीवरून गेट वे ऑफ इंडियाकडे जाण्यासाठी असलेल्या शेअर टॅक्सीमध्ये स्टूलवर बसवून प्रवास घडवण्यात येतो. स्टूलवरील प्रवाशांकडूनही पूर्ण शेअर भाडे वसूल करण्यात येते. अनेकदा टॅक्सीचालकांनी गणवेश परिधान केलेला नसतो. एकूणच प्रवासी सुरक्षित वाहतूक करण्यासाठी सर्व नियम सीएसएमटी ते चर्चगेट शेअर टॅक्सीला लागू होत नाहीत का असा प्रश्न प्रवासी निरंजन वाघ यांनी उपस्थित केला आहे.
फलक नाहीत
प्रादेशिक परिवहन कार्यालय अर्थात आरटीओच्या नियमानुसार शेअर टॅक्सीचा थांबा असलेल्या ठिकाणी मार्ग, भाडे, टॅक्सी उभी राहण्याची क्षमता अशी माहिती ठळकपणे दिसेल असे फलक असणे आवश्यक आहे. मात्र सीएसएमटी किंवा चर्चगेटवरून गेट वे साठी धावणाऱ्या शेअर टॅक्सी थांब्यावर असे फलक कुठेच दिसत नाही.