अल्पवयीन मुलाला मद्य विकणारा पब राज्य उत्पादन शुल्क विभागानं सील केला आहे. पबच्या मालकाला आणि व्यवस्थापकाला अटक करण्यात आली आहे. बांधकामिक व्यावसायिक असलेल्या विशाल अग्रवाल यांच्या आरोपी मुलानं अपघातापूर्वी पबमध्ये दीड तास मद्यपान केलं होतं. त्यावर त्यानं ४८ हजार रुपये खर्च केले होते. या पबमध्ये आरोपी मद्यपान करत असल्याचं सीसीटीव्ही फुटेज समोर आलं आहे.
पुणे पोलीस आयुक्त अमितेश कुमार यांनी टाईम्स ऑफ इंडियाला दिलेल्या माहितीनुसार, या प्रकरणातील आरोपी अल्पवयीन असून त्यानं कोझी नावाच्या पबमध्ये ४८ हजार रुपयांचं बिल भरलं होतं. तिथे आरोपी आणि त्याचे मित्र शनिवारी रात्री १० वाजून ४० मिनिटांनी पोहोचले होते. त्यानंतर ते दुसऱ्या एका पबमध्ये गेले.
Pune Porsche Accident: ‘त्या’ मुलामुळे लेकाची शाळा बदलावी लागली; पोर्श अपघातानंतर आमदार पत्नीनं सांगितली कटू आठवण
कोझी पबनं मद्य देणं बंद केल्यानंतर आरोपी आणि त्याचे मित्र रात्री १२ वाजून १० मिनिटांनी ब्लॅक मॅरिऑट पबमध्ये पोहोचले. पोलीस आयुक्तांनी दिलेल्या माहितीनुसार, त्यांना पबमध्ये ४८ हजार रुपयांचं बिल मिळालं आहे. या बिलाची रक्कम आरोपी मुलानंच दिली होती. या बिलात अल्पवयीन आणि त्याच्या मित्राला देण्यात आलेल्या मद्याच्या रकमेचा समावेश आहे.
अतिरिक्त पोलीस आयुक्त मनोज पाटील यांनी दिलेल्या माहितीनुसार, अल्पवयीन मुलानं कार चालवण्यासाठी मद्यपान केलं. तो काही पबमध्ये गेला होता. आरोपी आणि त्याचे मित्र मद्यपान करत असल्याचं सीसीटीव्ही फुटेज आमच्याकडे आहेत. उपलब्ध पुराव्यांच्या आधारे मोटार वाहन कायद्याच्या कलम १८५ च्या अंतर्गत गुन्हा दाखल करण्यात आला आहे.