आपल्या आईचा फोटो उराशी कवटाळून अमृता म्हणाली, माझी मम्मी माझ्यासाठी सर्वस्व होती. आता मी स्वत:ला सावरु शकत नाही. तुम्ही माझ्या आईला परत आणू शकता का?
यासोबतच कावेरी नाखवाचे पती प्रदिप नाखवा यांचेही थरारक घटनेचे कथन केले आहे. ते म्हणाले, अपघात घडताच कावेरी कारखाली अडकली होती, मी चालकाला कार थांबवण्यासाठी कारच्या मागे धावलो, विनवण्या केल्या पण त्याने कार थांबवली नाही. जर त्याने तेव्हा कार थांबवली असती तर माझी कावेरी वाचली असती.’ तसेच, हे सगळ्यांना माहीत आहे पण कोणी काही करत नाही. गरिबांसाठी कोणी पण पुढे येत नाही, असे म्हणत प्रदीप नाखवांनी टाहो फोडला आहे.
वरळीमध्ये कावेरी नाखवा आणि प्रदीप नाखवा आपल्या दुचाकीवरुन घरी परतत असताना त्यांच्या दुचाकीला भरधाव बीएमडब्ल्यू कारने जोरदार धडक दिली. ही कार शिवसेना नेत्याचा मुलगा राजेश शहा चालवत होता असा आरोप आहे. या धडकेत कावेरी नाखवा यांच्या दुचाकीचा भीषण अपघात झाला. यामध्ये कावेरी या कारखाली आल्या आणि त्यांना कार चालक मिहीरने वरळी सी लिंकच्या दिशेने फरफटत नेल्याचे समोर आले होते.
Mihir Shah Arrest: वरळी हिट अँड रन प्रकरणातील मुख्य आरोपी मिहीर शहाला अटक, अपघातानंतर ४८ तासांनी शहापूर येथून केली अटक
याप्रकरणी मुंबई पोलिसांनी आता आरोपी मिहीर शहासह १२ जणांना ताब्यात घेतले आहे. पोलिसांनी मिहीरला शहापूरमधून अटक केली आहे. मिहीरसोबत त्याची आई आणि बहीण यांनाही ताब्यात घेण्यात आलं आहे. तर वडील राजेश शहा हे पोलिसांच्या अटकेत आहेत. पोलिसांनी न्यायालयात सादर केलेल्या सीसीटीव्ही फुटेजमध्ये देखील धक्कादायक माहिती समोर आली आहे. यामध्ये समजते की, कावेरीला कारने दीड किलोमीटरपर्यंत फरफटत नेले. आरोपी मिहीर शाह आणि राजश्री बिदावत महिलेला बोनेटवरून खेचताना, तिला रस्त्यावर बसवताना आणि नंतर तिला खाली पाडताना आपली लक्झरी कार मात्र सुरक्षित ठेवल्याचे दिसत आहे.