सांगलीतील हॉस्पिटलमध्ये ‘वंचित’चा राडा; डॉक्टरसह कर्मचाऱ्यांना मारहाण, नेमकं कारण काय?

दरम्यान, या प्रकरणी डॉ. सुनील लक्ष्मण माने यांनी पोलिसात फिर्याद दिली आहे. त्यानुसार वंचित आघाडीचे जिल्हाध्यक्ष शंकर माने यांच्यासह १७ आंदोलकांवर गुन्हे दाखल केले आहेत. पोलिस मुख्यालयापासून हाकेच्या अंतरावर घडलेल्या या घटनेने खळबळ उडाली. आयएमए सांगली आणि मिरज शाखेने या घटनेचा तीव्र निषेध व्यक्त केला. संबंधितांवर कडक कारवाई झाली पाहिजे, अशी मागणी केली आहे.

‘वंचित’चे जिल्हाध्यक्ष शंकर माने, सिद्धनाथ माने, आकाश लोंढे, संतोष वनखडे, सविता माने, रेश् मा वनखेडे, राखी शिंदे (सर्व रा. कवठेमहांकाळ), सूरज काळे, संजय सनदी (दोघे रा.बोरगाव), बिरुदेव करडे (रा. वाल्मिक आवास, सांगली), पारगोंडा पाटील (रा. अथणी), विशाल कांबळे (रा. मिरज), शबाना पटेल (रा. शिरढोण), उज्ज्वला धोत्रे (रा. अंजनी), संजना आठवले (रा. इरळी), दीपाली सोनवणे (रा. मळणगाव), छाया कांबळे (रा. कोकळे) यांच्यावर गुन्हा नोंद झाला आहे.

पोलिसांनी दिलेल्या माहितीनुसार, विश्रामबाग चौकाच्या दक्षिणेला डॉ. शरद सावंत यांचे हे हॉस्पिटल आहे. येथे विविध शासकीय योजनेतून उपचार होतात. यातील काही उपचार योजनेत बसत नाहीत, असे सांगून अतिरिक्त शुल्क घेतल्याचा दावा एका रुग्णांच्या नातेवाइकांनी केला; तसेच कामगार योजनेतून उपचारास नकार दिल्याच्या तक्रारी ‘वंचित’कडे आल्याची माहिती जिल्हाध्यक्ष माने यांनी दिली.

दरम्यान, मंगळवारी याबाबत हॉस्पिटल परिसरात आंदोलनाचा इशारा देऊन माध्यम प्रतिनिधींना बोलवण्यात आले होते. प्रत्यक्षात मात्र दुपारी साडेबाराच्या सुमारास कार्यकर्ते हाती झेंडे घेऊन जोरदार घोषणाबाजी करीत हॉस्पिटलमध्ये घुसले. कार्यकर्त्यांनी निवासी डॉक्टर माने आणि कर्मचाऱ्यांनाही मारहाण केली. काही कार्यकर्त्यांनी काठ्यांनी हॉस्पिटलच्या औषध दुकानाच्या, खिडक्यांच्या टेबलांवरील काचांची तोडफोड केली.