संपूर्ण देशाचे लक्ष वेधून घेतलेल्या बारामती लोकसभा मतदारसंघातील बारामतीसह सर्वच तालुक्यांत सध्या पाणीटंचाईचे भीषण संकट ओढवले आहे. पुणे जिल्ह्यात आजमितीला २५२ टँकरने पाणीपुरवठा सुरू असून, निम्म्यापेक्षा अधिक टँकर बारामती तालुका आणि या मतदारसंघातील विविध परिसरांत सुरू आहेत. जिल्ह्यात पुरंदर तालुक्याला टंचाईच्या सर्वाधिक झळा बसत आहेत. बारामती मतदारसंघात येणाऱ्या विविध भागांत १८३ आणि उर्वरित तालुक्यांत ६९ टँकर सुरू आहेत. मावळ आणि मुळशी या दोन तालुक्यांत सध्या टँकरची गरज नाही.
पुणे जिल्ह्यासह महाराष्ट्रातील लोकसभा निवडणुकांचे तापलेले वातावरण शांत झाले आहे. विदर्भ, मराठवाड्यात उष्णतेच्या लाटा तीव्र होत आहेत. दुसरीकडे, राज्यातील विविध धरणांमधील पाण्याने तळ गाठला आहे. परिणामी, खासगी, सरकारी टँकरने पाणीपुरवठा करण्याची परिस्थिती निर्माण झाली आहे.
१८१ गावांत पाणीटंचाई
पुणे जिल्ह्यात आजमितीला २५२ टँकरद्वारे सुमारे चार लाखांहून अधिक नागरिकांना पाणीपुरवठा करण्यात येत आहे. १८१ गावांसह १,३१६ वाड्यावस्त्यांमधील नागरिकांना पाणीटंचाईचा फटका बसला आहे. एक लाख ७२ हजार ३८५ जनावरांना पाण्याची टंचाई भासत आहे. १८१ गावांसाठी सध्या २४४ खासगी टँकरने आणि सहा सरकारी टँकरनी पाणीपुरवठा सुरू आहे. या गावांसाठी आतापर्यंत ८४२ टँकरच्या खेपा प्रस्तावित असून, त्यापैकी आतापर्यंत ७६८ टँकरने पाणीपुरवठा करण्यात आला आहे. जिल्ह्यात पाणीपुरवठा करण्यासाठी ७८ खासगी विहिरी; तसेच १९ बोअरचे अधिग्रहण करण्यात आले आहे. बारामती मतदारसंघातील बारामती, दौंड, इंदापूर, हवेली, पुरंदर, भोर, वेल्हे या तालुक्यांत टंचाई अधिक दिसत आहे.
पुरंदरमध्ये ८७ टँकर
पुणे जिल्ह्यात सध्या सर्वाधिक ८७ टँकर पुरंदर तालुक्यात पाणीपुरवठा करीत आहेत. तालुक्यातील ४० गावांसह ३५३ वाड्यावस्त्यांमधील एक लाखांहून अधिक नागरिकांना पाण्यासाठी वणवण करावी लागत आहे. पुरंदर तालुका बारामती मतदारसंघातील सर्वाधिक दुष्काळी तालुका मानला जातो. यंदा पावसाने दडी मारल्याने या तालुक्यातील अनेक गावांना पाणीटंचाईला सामोरे जावे लागत आहे. मुळशी, मावळ तालुक्यात अद्याप एकही टँकर सुरू नाही. भोर, वेल्हे तालुक्यात टँकरची गरज कमी आहे. मात्र, पुरंदरपाठोपाठ बारामती, हवेली, इंदापूर, जुन्नर आणि आंबेगाव तालुक्यांना टँकरने पाण्याची अधिक आवश्यकता असल्याचे जिल्हा परिषदेच्या आकडेवारीतून स्पष्ट होत आहे.
तालुका टँकर संख्या
पुरंदर ८७
बारामती २८
हवेली २६
आंबेगाव २३
जुन्नर २०
इंदापूर १९
खेड १४
शिरूर १२
दौंड १०
भोर ९
वेल्हे ४
मावळ ०
मुळशी ०
एकूण २५२