अर्थसंकल्प मांडल्यानंतर अनेक सदस्य त्याबद्दलच्या चर्चेमध्ये मागण्या करतात. अनेक सदस्यांना त्यामध्ये सहभागी व्हायचे असते. मात्र ही चर्चा वेळेत संपून अर्थसंकल्प मंजूर करून घेण्यासाठी सत्ताधारी पक्षाकडून गिलोटीन या संसदीय आयुधाचा वापर केला जातो. गिलोटीनची वेळ जाहीर केल्यानंतर सुरू असलेली चर्चा तातडीने थांबवून त्या वेळेला मतदान घेऊन अर्थसंकल्प मंजूर केला जातो. गिलोटीन कधीही तहकूब होत नाही किंवा पुढील दिवशी ढकलला जात नाही. विधानसभेच्या कामकाजानुसार सोमवारी संध्याकाळी साडेपाच वाजता गिलोटीन जाहीर करण्यात आले होते. साहजिकच सोमवारी अर्थसंकल्प मंजूर होणे अपेक्षित होते. मात्र तसे घडले नाही.
पावसामुळे सोमवारी सभागृहाचे कामकाज तहकूब करण्यात आले. मात्र सायंकाळी साडेपाच वाजता गिलोटिन ठेवले आणि त्यामुळे आधी अर्थसंकल्प मंजुरीस ठेवून त्यास सभागृहाची मान्यता देत त्यानंतर विनियोजन विधेयकास मान्यता घेऊन मग सभागृह तहकूब करायला हवे, हे अनवधानाने विधानसभेतील अधिकाऱ्यांच्या आणि पर्यायाने अध्यक्षांच्या लक्षात राहिले नसल्याची बाब समोर आली. याबाबत अधिक माहिती घेतली असता विधिमंडळात यापूर्वी असा प्रकार घडल्याचे कुणाला स्मरत नाही, असा प्रकार पहिल्यांदाच घडल्याचे सांगितले जात आहे. वास्तविक त्याची त्वरित जाणीव विधानभाध्यक्षांना तिथे उपस्थित असलेल्या सचिवांनी करून देणे आवश्यक होते. पण त्यांनीही ती करून दिली नाही. त्यामुळे आता आता याबाबत मंगळवारी काय कामकाज ठरवणार ? त्यावर काही तांत्रिक तसेच कायदेशीर अडचण होऊ शकते का, याबाबत सभागृहाच्या बाहेर चर्चा सुरू होती.