पुणे : लोकसभा निवडणुकीनंतर विधानसभेचा बिगुल वाजला आहे. महायुती आणि महाविकास आघाडीमध्ये उमेदवारांची चाचपणी सुरू आहे. पण, नवीन इच्छुक उमेदवारांची यादी वाढत चाललेली आहे. महायुती, महाविकास आघाडी पक्षातूनच मित्र पक्षांच्या जागेवर दावा करायला सुरुवात केली आहे. महायुतीच्या खडवासला मतदारसंघातून शिवसेनेचे जिल्हा प्रमुख रमेश कोंडे यांनी दावा केला आहे. त्यामुळे विद्यमान आमदार भीमराव तापकीर यांची डोकेदुखी वाढली आहे. त्यामुळे हक्काची जागा भाजपला सुटेल का, हा देखील प्रश्न आहे.
पुण्यात शिवसेना किती जागा लढवणार?
शहर प्रमुख नाना भानगिरे यांनी दिलेल्या माहितीप्रमाणे, पुण्यातल्या ३ जागा शिवसेना लढवणार आहे. यामधील दोन जागा राष्ट्रवादी अजित पवार गटाच्या आहेत, तर एक जागा ही भाजपची आहे. म्हणून महायुतीमध्ये मोठी चुरस दिसत आहे. शिवसेनेने हडपसर, खडवासला, वडगावशेरी असे तीन मतदारसंघ मागितले असल्याची माहिती आहे. हडपसरसाठी शहर प्रमुख नाना भानगिरे इच्छुक आहेत, तर आता खडवासलामधून पण रमेश कोंडे यांच नाव पुढे आलं आहे. रमेश कोंडे यांनी तीनवेळा मतदारसंघात प्रयत्न केला होता. पण, ते अपयशी ठरले.
रमेश कोंडेचा प्रवास
- शिवसेना शाखा प्रमुख ते जिल्हाप्रमुख
- २०१४, २०१९ विधानसभा लढण्यासाठी दावा
- ग्रामपंचायत पासून ते लोकसभा निवडणुकीत सक्रिय सहभाग
- २००५ साली खेड शिवापूर गावचे सरपंच
- २००७ साली जिल्हा परिषद लढवली
- जिल्हा नियोजन समिती निवडणुकीत ११ मते घेत शिवसेनेकडून विजय
- खडकवासला विधानसभा मतदारसंघात मजबूत पक्ष संघटन
- २०१९ साली अपक्ष फॉर्म दाखल केला मात्र नेतृत्वाच्या आग्रहामुळे माघार घेतली
खडवासला मतदारसंघातून विद्यमान आमदाराचं तिकीट कापून नवीन उमेदवाराला संधी मिळेल, की तीन टर्म प्रतीक्षेत राहिलेले उमेदवारला आणखी काही काळ प्रतीक्षा करावी लागेल, हे येणाऱ्या काळात पाहणं महत्वाचं असेल.