महाराष्ट्राच्या विधानसभा निवडणुकीमध्ये महायुतीला स्पष्ट बहुमत मिळालं आहे. महायुतीनं राज्यात तब्बल 230 जागांवर विजय मिळवला. मात्र असं असताना देखील अजूनही महायुतीमधून नव्या मुख्यमंत्र्यांच्या नावाची घोषणा करण्यात आलेली नाही. समोर येत असलेल्या माहितीनुसार देवेंद्र फडणीस हेच नवे मुख्यमंत्री असणार हे जवळपास निश्चित झालेलं आहे, मात्र अद्यापही घोषणा करण्यात आलेली नाहीये. दुसरीकडे सूत्रांकडून मिळत असलेल्या माहितीनुसार एकनाथ शिंदे हे गृहमंत्रिपदावर अडून बसल्याची माहिती समोर येत आहे. गृहमंत्रिपद मिळालं तरच उपमुख्यमंत्रिपद स्विकारेल अशी त्यांची भूमिका आहे. परंतु भाजप गृहमंत्रिपद आपल्याकडेच ठेवण्यासाठी अग्रही आहे. यावर अजूनही तोडगा निघू शकलेला नाही. जर गृहमंत्रिपद एकनाथ शिंदे यांना मिळालं नाही तर उपमुख्यमंत्रिपद शिवसेनेच्या एखाद्या ज्येष्ठ नेत्याला मिळण्याची शक्यता आहे. या सर्व पार्श्वभूमीवर आता भाजप नेते प्रवीण दरेकर यांनी प्रतिक्रिया दिली आहे.
नेमकं काय म्हणाले दरेकर?
गृहमंत्रिपद कुणाला द्यायचं याची चर्चा उघड उघड होत नाही, बंद दाराआड ही चर्चा होते. वरिष्ठ नेते ठरवतील गृहमंत्रिपद कुणाला द्यायचं, कोण अडून बसलंय ? नडून बसलंय याला काही महत्त्व नाही , महायुतीत समन्वय आहे. पाच तारखेला सगळं क्लियर होईल. आमच्यात एक नंबर दोन नंबर अशी कोणतीच स्पर्धा नाहीये, सगळे मिळून महायुतीत काम पाहत आहोत. विरोधक हरले म्हणून फेक नरेटिव्ह पसरवत आहेत. शिवसेनेतून कोण आमदार मंत्री असावा याबाबत एकनाथ शिंदे निर्णय घेतील. भाजपकडून आमदाराला मंत्रिपद देताना अनेक निकश लावले जातात, असं दरेकर यांनी म्हटलं आहे.
दरम्यान राष्ट्रवादी शरद पवार गटाचे अध्यक्ष शरद पवार यांच्याकडून देखील ईव्हीएमवर शंका उपस्थित करण्यात आली आहे. यावर प्रतिक्रिया देताना प्रवीण दरेकर यांनी जोरदार हल्लाबोल केला आहे. जिंकले तर ईव्हीएम चांगले, कर्नाटकमध्ये जिंकले, तेलंगणामध्ये जिंकले, पवार धुर्त आहेत, आमदार टिकवण्यासाठी ते असं बोलत असतील. कारण त्यांचे आमदार एकतर अजित पवार यांच्याकडे जातील किंवा भाजपात येतील असं दरेकर यांनी म्हटलं आहे.