नगरचे ‘सिव्हील’ पुन्हा संशयाच्या भोवऱ्यात, पूजा खेडकरचे प्रमाणपत्र येथूनच दिले, पण…

अहमदनगर : बदल्यांसाठी प्राथमिक शिक्षकांना खोटी दिव्यांग प्रमाणपत्र दिल्याप्रकरणी पूर्वी अडचणीत आलेले नगरचे जिल्हा रूग्णालय (सिव्हील हॉस्पिटल) पुन्हा एकदा संशयाच्या भोवऱ्यात सापडले आहे. वादग्रस्त आयएएस अधिकारी पूजा खेडकर यांना दिव्यांग प्रमाणपत्र याच रुग्णालयातून देण्यात आले आहे. अर्थात खेडकर यांचे हे प्रमाणपत्र योग्य की अयोग्य, यासंबंधी अद्याप स्पष्टता झालेली नाही. मात्र, पूर्वीचे अनुभव लक्षात घेता चौकशी करण्याची मागणी होत आहे. पुण्यातील आम आदमी पक्षाचे पादाधिकारी विजय कुंभार यांनी खेडकर यांच्याशीसंबंधित कागदपत्रे रुग्णालयातून ताब्यात घेऊन चौकशी करावी, अशी मागणी मुख्यमंत्र्याकडे केली आहे.

प्रशिक्षणार्थी आयएएस अधिकारी पूजा खेडकर आणि त्यांच्या कुटुंबीयांसंबंधी पुण्यात विविध प्रकारची कारवाई सुरू झाली आहे. नोकरीसाठी निवड होताना खेडकर यांनी दिव्यांग असल्याचे प्रमाणपत्र दिले आहे. इतर काही गोष्टी उघड झाल्यानंतर आता या प्रमाणपत्रावरही शंका घेतली जाऊ लागली आहे. नगरच्या सामाजिक न्याय विभागात या प्रमाणपत्राची नोंद आहे. त्यासाठी त्यांची २०१८ व २०२० अशी दोनदा जिल्हा रुग्णालयात तपासणी केल्यानंतर त्यांना दृष्टीदोष आणि मानसिक आजाराचे प्रमाणपत्र देण्यात आले आहे. आता यावरून जिल्हा रुग्णालयाबद्दल संशय व्यक्त केला जाऊ लागला आहे.

पूर्वी जिल्हा परिषदेच्या शिक्षकांना बदल्यांसाठी दिव्यांग प्रमाणपत्रे देण्यात आली होती. ती चुकीच्या पद्धतीने देण्यात आल्याचे उघड झाले होते. याप्रकरणी संबंधित शिक्षकांसोबतच प्रमाणपत्रे देणाऱ्या तत्कालीन डॉक्टरांविरूद्धही गुन्हा दाखल झाला आहे. खेडकर यांचेही प्रमाणपत्रे याच रुग्णालयातील असल्याने त्याबद्दलही शंका घेतली जाऊ लागली आहे. लोकसेवा आयोगाच्या परीक्षेत याच प्रमाणपत्राद्वारे खेडकर यांनी हे पद मिळवल्याचा आरोप करत काही जणांनी माहिती अधिकार कायद्यानुसार माहिती मागविली आहे. दृष्टिहीन आणि मानसिक आजारी असल्याचा दावा करत पूजा खेडकर आयएएस झाल्या. त्यासाठी त्यांना सहा वेळा वैद्यकीय चाचणीसाठी बोलवले होते. मात्र, सहा वेळा त्या हजर राहिल्या नाहीत. त्याऐवजी बाहेरुन वैद्यकीय अहवाल दिला, त्यामुळे वाद निर्माण झाला आहे.