उद्धव ठाकरे महाविकास आघाडीतील वरिष्ठ नेत्यांच्या गाठीभेटी घेऊन विधानसभा निवडणुकीची रणनीती ठरवतील, अशी माहिती खासदार संजय राऊतांनी काल दिली. ‘लोकसभेत केलेल्या कामगिरीची पुनरावृत्ती विधानसभा निवडणुकीत करुन आम्हाला राज्यात महाविकास आघाडीची सत्ता आणायची आहे. त्यासाठी वरिष्ठ नेत्यांची होणारी बैठक महत्त्वाची आहे,’ असं राऊत म्हणाले होते.
लोकसभा निवडणुकीत महाविकास आघाडीनं राज्यात ४८ पैकी ३० जागा जिंकत मोठी मुसंडी मारली. तर सत्ताधारी महायुतीला केवळ १७ जागांवर समाधान मानावं लागलं. विधानसभा निवडणुकीसाठी मविआनं आपल्याला मुख्यमंत्रिपदाचा चेहरा म्हणून घोषित करावं यासाठी ठाकरे आग्रही असल्याची माहिती ठाकरे गटातील सुत्रांनी दिल्याचं द न्यू इंडियन एक्स्प्रेसनं आपल्या वृत्तात म्हटलं आहे.
‘लोकसभा निवडणुकीत आम्हाला काँग्रेस, शरद पवार गटापेक्षा कमी जागा मिळाल्या असल्या तरीही उद्धव ठाकरेच प्रचाराचा चेहरा होते ही बाब कोणीही नाकारु शकत नाही. ठाकरेंची भाषणं मतदारांना भावली. भाजपनं ठाकरेंचं सरकार उलथवून लावलं. पण आता राज्यातील जनता ठाकरेंना पुन्हा एकदा मुख्यमंत्रिपदी पाहण्यास उत्सुक आहे,’ असं ठाकरेसेनेच्या नेत्यानं नाव प्रसिद्ध न करण्याच्या अटीवर सांगितलं.
‘ठाकरेंना मुख्यमंत्रिपदाचा चेहरा घोषित केल्यास पक्ष संघटना चार्ज होईल. शिवाय मतदारांमध्ये चांगला संदेश जाईल. उद्धव ठाकरे आणि एकनाथ शिंदे किंवा देवेंद्र फडणवीस असे पर्याय मतदारांसमोर असल्यास मविआला निश्चित फायदा होईल. त्यामुळे मविआनं ही संधी दवडू नये,’ असं ठाकरेसेनेचा नेता म्हणाला.