पिंपरी चिंचवड, पुणे : ज्येष्ठ नेते शरद पवार यांच्याबाबत समाजात असलेलं वलय नवीन नाही. मात्र तरुणाईतही शरद पवारांची मोठी क्रेझ पाहायला मिळते. राष्ट्रवादी काँग्रेस : शरदचंद्र पवार पक्षाच्या विजयी संकल्प मेळाव्यात एक तरुणी हातात “साहेब, आय वॉन्ट टू मिट यू” असा संदेश लिहिलेला बोर्ड घेऊन उभी होती. तो पाहून शरद पवारांनी तिला जवळ बोलावत तिची चौकशी केली आणि त्यावर तिला स्वाक्षरीही दिली.
राष्ट्रवादी काँग्रेस पक्षात फूट पडल्यानंतर अजित पवारांनी वेगळा मार्ग निवडला. अनेक दिग्गज नेते शरद पवारांची साथ सोडून गेले. त्यानंतर शरद पवारांनी पुन्हा एकदा शून्यातून मोर्चे बांधणी करण्यास सुरुवात केली. लोकसभा निवडणुकीत त्यांनी मोठे यश मिळवले. आता पुन्हा एकदा शरद पवार विधानसभा निवडणुकीसाठी ऍक्टिव्ह झाल्याचे पाहायला मिळत आहे.
नेमकं काय घडलं?
पिंपरी चिंचवडमध्ये नुकताच कार्यकर्ता मेळावा पार पडला. विजय संकल्प मेळाव्याच्या वेळी शरद पवार यांची अनेक जण आतुरतेने वाट पाहत होते. पवारांची ग्रँड एंट्री झाली. ते मंचावर स्थानापन्न झाले. त्याचवेळी गर्दीतून एक पंधरा ते सोळा वर्षांची मुलगी एक बोर्ड पवारांच्या दिशेने उंचावत होती.
हातातील बोर्डवर स्वाक्षरी
हातात बोर्ड घेऊन त्यावर “साहेब, आय वॉन्ट टू मिट यू” असा संदेश लिहून ती उभी होती. या बोर्डने सर्वांचेच लक्ष वेधले होते. शरद पवारांच्या नजरेतून ते सुटलं असतं तरच नवल. त्यांनी स्वतः या तरुणीला जवळ बोलवलं. शरद पवारांनी तिला तिचं नाव विचारलं. कृष्णाली चंद्रकांत कुदळे असे त्या मुलीचे नाव होते. त्यानंतर पवारांनी तिच्या हातातील बोर्ड घेऊन त्यावर आपली स्वाक्षरी देत तिला आशीर्वाद दिले. त्यामुळे या तरुणीची चर्चा आता पिंपरी चिंचवड शहरात होऊ लागली आहे.
शरद पवार यांचं गारुड फक्त ज्येष्ठांवरच नाही तर तरुणांवरही असल्याचं या निमित्ताने पुन्हा अधोरेखित झालं. प्रत्येक जण शरद पवार यांच्या भेटीसाठी आतुरलेले पाहायला मिळतात. राज्यातील राजकारण शरद पवार यांच्याच भोवती फिरत असल्याचं अनेक जण सांगतात.