सध्या राजकीय सभा, तसेच धार्मिक, सांस्कृतिक कार्यक्रमांसाठी शिवाजी पार्क मैदानातील जागा देताना मुंबई महापालिका अवघे २५० रुपये अधिक जीएसटी एवढे शुल्क आकारते, तर २० हजार रुपये अनामत रक्कम घेते. शुल्क आणि अनामत रक्कम अत्यंत अल्प असल्याने, ती वाढण्याचा विचार महापालिकेकडून केला जात आहे. एक लाख रुपये किंवा अधिक अनामत रक्कम आणि २० ते ३० हजार रुपये शुल्क आकारण्याचा महापालिकेचा विचार आहे. महापालिकेच्या जी उत्तर विभागाकडून त्यासंदर्भातील प्रस्ताव महापालिकेच्या मालमत्ता विभागाकडे लोकसभा निवडणुकीनंतर पाठवण्यात येणार आहे. त्यानंतरच अंतिम निर्णय घेतला जाईल.
सभा किंवा कार्यक्रमांनंतर मैदानाची दुरवस्था होती. त्याच्या दुरुस्तीखर्चाची वसुली आयोजकांनी ठेवलेल्या अनामत रकमेतून केली जाते. मात्र ती अत्यल्पच असते. मागील अनेक वर्षे या शुल्कामध्ये वाढ करण्याचा विचार केला जात आहे, अशी माहिती वरिष्ठ अधिकाऱ्याने दिली.
धोरणाचा विचार
राजकीय सभा, सांस्कृतिक आणि धार्मिक कार्यक्रमांमुळे शिवाजी पार्क मैदानाची होणारी दुरवस्था टाळण्यासाठी शुल्क आणि अनामत रकमेमध्ये वाढ करण्याचा गांभीर्याने विचार होत आहे. या कार्यक्रमांसाठी मैदानात खोदकाम केल्यानंतर, ते बुजवणे, मैदानाची साफसफाई यांसाठी अनामक रकमेमधून सध्या कापण्यात येणारी रक्कम अत्यल्प आहे. त्यातही वाढ करण्यात येईल, असेही सूत्रांनी सांगितले.
धुळीवर तोडगा नाहीच
शिवाजी पार्क मैदानातील धुळीच्या समस्येवर अद्याप कायमस्वरूपी तोडगा काढण्यात यश आलेले नाही. पार्कमधील माती वाऱ्यामुळे उडत असून, त्याचा शिवाजी पार्क परिसरातील रहिवाशांना त्रास होत आहे. सध्या धुळीचे प्रदूषण रोखण्यासाठी मैदानातील हवेत उडणारी माती व्हॅक्युम तंत्राच्या साह्याने ट्रकमध्ये जमा केली जात आहे. मात्र यावर कायमस्वरूपी तोडगा काढण्यासाठी आयआयटी, मुंबईकडून उपाययोजना सुचवल्या जाणार आहेत. यासाठी आयआयटीतील तज्ज्ञांनी एप्रिल अखेरीस मैदानाची पाहणी केली होती. लवकरच त्याचा अहवाल मुंबई महापालिकेच्या पर्यावरण विभागाला सादर केला जाणार आहे.