- पहिल्या फेरी अखेर राष्ट्रवादी शरद पवार गटाचे उमेदवार अमोल कोल्हे 6 हजार मतांनी आघाडीवर
- दुसऱ्या फेरी अखेर अमोल कोल्हे आघाडीवर, कोल्हे ९५५३ मतांनी आघाडीवर
- अमोल कोल्हे तिसऱ्या फेरीअखेर १४ मतांनी आघाडीवर
| उमेदवार | पक्ष | कोण जिंकले, कोण हरले? |
| डॉ. अमोल कोल्हे | राष्ट्रवादी (शरदचंद्र पवार) | |
| शिवाजीराव आढळराव पाटील | राष्ट्रवादी (अजित पवार) | |
| अन्वर शेख | वंचित बहुजन आघाडी | |
| राहुल ओव्हाळ | बहुजन समाज पार्टी | |
| नारायण कांबळे | बहुजन पक्ष |
आधी काँग्रेसचा आणि नंतर शिवसेनेचा बालेकिल्ला म्हणून ओळखला जाणाऱ्या पूर्वीच्या खेड आणि आताच्या शिरूर लोकसभा मतदारसंघात राष्ट्रवादी काँग्रेस शरदचंद्र पवार आणि राष्ट्रवादी काँग्रेस या पक्षांत होणारी ही निवडणूक बारामतीसारखीच झाली. विद्यमान खासदार डॉ. कोल्हे आणि आढळराव अशी थेट लढाई असली, तरी ‘साहेब विरुद्ध दादा’ असेच चित्र होते.
शिवसेनेकडून खासदारकीची हॅटट्रिक साधलेले शिवाजीराव आढळराव हातात घड्याळ बांधून मैदानात उतरले होते. ही माझी शेवटची निवडणूक असल्याचे भावनिक आवाहन त्यांनी केले होते. या निवडणुकीवर आढळरावांची राजकीय कारकीर्द अवलंबून होती; तर २०१९ आधी शिवसेनेतून राष्ट्रवादी काँग्रेस पक्षात येऊन खासदार झालेले अभिनेते डॉ. अमोल कोल्हे यांच्यापुढे खासदारकी राखण्याचे आव्हान होते. शिरूर लोकसभा मतदारसंघात ३२ उमेदवार रिंगणात होते. वंचित बहुजन आघाडीतर्फे प्रा. डॉ. आफताब अन्वर मकबूल शेख निवडणूक लढवत असले तरी हा सामना दोघांतच रंगला.
आढळरावांसाठी लढाई सोपी नव्हती!
शिरूर लोकसभा मतदारसंघात जुन्नर, आंबेगाव, खेड, शिरूर, भोसरी आणि हडपसर हे सहा विधानसभा मतदारसंघ येतात. शिरूरचे आमदार अशोक पवार हे शरद पवारांसोबत आहेत. आंबेगावचे आमदार आणि मंत्री दिलीप वळसे पाटील, जुन्नरचे आमदार अतुल बेनके, खेडचे आमदार दिलीप मोहिते आणि हडपसरचे आमदार चेतन तुपे असे चार आमदार अजितदादांसोबत आहेत. हे चार आमदार आणि भोसरीचे भाजपचे आमदार महेश लांडगे असा विचार करता कागदावर महायुतीचे पारडे जड असले, तरी आढळरावांसाठी ही लढाई तितकी सोपी नव्हती.
शरद पवार यांच्याभोवती सहानुभूतीची लाट
२०१९मध्ये पहिल्यांदाच खासदार झालेल्या कोल्हे यांच्यावर पाच वर्षांत मतदारसंघात फिरकले नसल्याचा आरोप झाला. आढळराव खासदार नसताना लोकांसाठी उपलब्ध होते, असेही सांगितले गेले. मात्र, शिवसेना आणि राष्ट्रवादी काँग्रेस पक्षाबाबत झालेल्या फोडाफोडीच्या राजकारणाने शरद पवार आणि उद्धव ठाकरे यांच्याबद्दल ग्रामीण भागात सहानुभूतीची भावना दिसून आली. याचा फायदा कोल्हेंना होण्याची शक्यता होती.
वळसे पाटील यांच्यावर आढळरावांच्या विजयाची जबाबदारी होती, मात्र….
आढळराव तसे मूळचे ‘राष्ट्रवादी’चे…. सन २००४मध्ये ते शिवसेनेत गेले आणि खासदार झाले. त्यानंतर आढळराव आणि राष्ट्रवादीचा संघर्ष वाढत गेला. जुने मित्र, नंतर राजकीय प्रतिस्पर्धी आणि आता पुन्हा मित्र झालेल्या वळसे पाटील यांच्यावर आढळरावांच्या विजयाची जबाबदारी होती. मात्र, ते घरात पाय घसरून पडले आणि तेव्हापासून ते प्रचारापासून दूर राहिले. दुसरीकडे राष्ट्रवादीचे इतर आमदार आणि स्थानिक कार्यकर्ते आढळरावांच्या प्रचार यंत्रणेत फारसे सक्रिय नसल्याचे दिसून आले. आढळरावांचे कार्यकर्त्यांनी ही बाब खासगीत मान्य केली. यामुळेच आढळरावांनी स्वत:ची यंत्रणा जोमाने कामाला लावली होती. सुरुवातीला प्रचारात मागे असलेल्या आढळरावांनी मग प्रचारात वेग घेतल्याचे दिसले. बारामतीच्या मतदानानंतर अजितदादांनी आढळरावांसाठी सभांचा सपाटा लावला होता. दुसरीकडे कोल्हेंसाठी शरद पवार यांची राष्ट्रवादी; तसेच काँग्रेस आणि शिवसेना उद्धव बाळासाहेब ठाकरे पक्षाचे कार्यकर्ते काम करीत होते. २०१९च्या निवडणुकीवेळी कोल्हे यांना छत्रपती शिवाजी महाराज आणि छत्रपती संभाजी महाराजांच्या भूमिकेचा फायदा मिळाला. तशी भावनिक स्थिती आता नाही; पण पवार हेच या निवडणुकीतील नाणे असल्याने पुन्हा निवडणूक भावनिकच होणार असल्याचे लोकांमधील चर्चेवरून जाणवले.
मतदारसंघातील प्रश्न
-निर्यातबंदीमुळे कांद्याला फटका
-पुणे-नाशिक, पुणे-नगर, पुणे-सोलापूर रस्त्यावरील वाहतूक कोंडी
-पुणे-नाशिक सेमी हायस्पीड रेल्वे, इंद्रायणी मेडिसिटी, शिवसंस्कार सृष्टी, जुन्नरचा पर्यटन विकास, असे रखडलेले प्रकल्प