ती घरातून निघाली, थोड्यावेळाने मित्राचा फोन, ‘वहिनी गेली रे’… सांगलीत महिला पोलिसाचा मृत्यू

याबाबत प्रितंका यांचे दीर सागर सर्जेराव लोंढे यांनी पोलिसांत फिर्याद दिली आहे. प्रितंका अनंत पोटे उर्फ प्रितंका संतोष लोंढे या तुरची येथील पोलीस प्रशिक्षण केंद्रात मैदानी खेळाच्या प्रशिक्षक म्हणून कार्यरत होत्या. मंगळवारी (४ जानेवारी) पहाटे पाच वाजण्याच्या सुमारास देवराष्ट्रे येथून त्या तुरची येथे पोलिस प्रशिक्षण केंद्र येथे दुचाकीवरून निघाल्या होत्या. यादरम्यान, बलवडी फाटा येथे त्यांच्या मोपेडला चारचाकीची जोरदार धडक बसली, त्यात प्रितंका यांच्या डोक्याला गंभीर मार लागला. त्या रस्त्याच्या कडेला जाऊन पडल्या आणि त्यात त्यांचा जागीच मृत्यू झाला.

प्रितंका यांचे पती संतोष यांना त्यांचे मित्र अक्षय शिंदे यांचा पहाटे पावणे सहाच्या सुमारास फोन आला, त्यांनी फोनवरून या दुर्दैवी अपघाताची माहिती दिली. हे ऐकताच घरात एकच गोंधळ माजला, नातेवाईकांनी लगेच बलवडी फाट्याकडे धाव घेतली. तेव्हा घटनास्थळी त्यांना प्रितंका यांची दुचाकी आणि अपघातग्रस्त कार दिसून आली. हा अपगात इतका भीषण होता की दोन्ही वाहनांचे मोठे नुकसान झाले होते. तर, प्रितंका यांच्या डोक्याला गंभीर मार लागल्याने त्यांचा जागीच मृत्यू झाला होता.

घटनेनंतर विटा पोलिसांनी घटनास्थळी दाखल होऊन घटनेचा पंचनामा केला. प्रितंका यांचा मृतदेह पलूस येथील ग्रामीण रुग्णालयात शवविच्छेदनासाठी नेण्यात आला. दरम्यान, अपघातातील कार चालक उदय रामचंद्र पवार यांच्यावर पोलिसांनी गुन्हा दाखल केला आहे. विटा पोलीस ठाण्यात गुन्हा दाखल झाला असून पोलीस या प्रकरणाचा तपास करत आहेत.