शरद पवार मारकडवाडीला जाणारImage Credit source: Facebook
राष्ट्रवादी शरदचंद्र पवार पक्षाचे अध्यक्ष शरद पवार आज मारकडवाडी गावच्या दौऱ्यावर आहेत. शरद पवार आज मारकडवाडी ग्रामस्थांशी संवाद साधणार आहेत. शरद पवारांच्या दौऱ्यासाठी मारकडवाडीत भव्य सभा मंडप उभारण्यात आला आहे. तसंच हेलिपॅडची व्यवस्था देखील करण्यात आली आहे. मारकडवाडी गावात मोठ्या प्रमाणात ‘ईव्हीएम हटाव, देश बचाव’ अशा आशयाची बॅनरबाजी करण्यात आली आहे.
मारकडवाडी ग्रामस्थांनी भाजपच्या राम सातपुतेंना मताधिक्य मिळाल्याने ईव्हीएम मशीनवर आक्षेप घेतला आहे. भाजप उमेदवार राम सातपुते यांना 1003 मतं तर राष्ट्रवादी शरद पवार गटाचे उत्तम जानकर यांना 843 मतं मिळाली होती. गावकऱ्यांनी या आकडेवारीवर आक्षेप नोंदवत इतकं कमी मतदान उत्तम जानकारांना होऊ शकत नाही? असा सवाल उपस्थित केला आहे. त्यानंतर मारकडवाडी गावाने बॅलेट पेपर पद्धतीने मतदान चाचणी घेण्याचा प्रयत्न केला होता. मात्र प्रशासनाने हा प्रयत्न हाणून पाडल्याचं पाहायला मिळालं होतं. तर दुसरीकडे विकास कामे केल्यानेच मतदान झाल्याचा दावा भाजपच्या राम सातपुते यांनी केला आहे. त्यामुळे शरद पवार आजच्या दौऱ्यात काय भूमिका मांडतात हे पाहणे महत्त्वाचे आहे.