राज्यात महापालिका निवडणुकांचे पडघम वाजले आहेत. महापालिका निवडणुका जिंकण्यासाठी सर्वच राजकीय पक्षांनी जोरदार तयारी सुरू केली आहे. खास करून मुंबई महापालिका जिंकण्यासाठी ठाकरे गट आणि भाजपमध्ये जोरदार रस्सीखेच सुरू आहे. तर मुंबई महापालिकेत आपलंही वजन वाढवण्याचा एकनाथ शिंदे यांच्या शिवसेनेचा प्रयत्न सुरू आहे. या चर्चा सुरू असतानाच मनसे आणि ठाकरे गटाच्या युतीच्याही जोरदार चर्चा सुरू आहेत. महापालिका निवडणुकीत मनसेसोबत युती करणार की महाविकास विकास आघाडीसोबत युती करणार? असा सवाल ठाकरे गटाचे नेते संजय राऊत यांना करण्यात आला. त्यावर त्यांनी नेमकं उत्तर दिलं आहे.
खासदार संजय राऊत हे मीडियाशी संवाद साधत होते. यावेळी त्यांनी थेट उत्तर देणं टाळलं. मात्र, मीडियाच्या प्रश्नाला उत्तर देताना काही सूचक विधानं करून चर्चेचं रान मोकळं करून दिलं आहे. मनसे सोबत महापालिकेत जायचं की महाविकास आघाडीसोबत जायचं याचं उत्तर उद्धव ठाकरे लवकरच देतील. ते तुमच्या प्रश्नांची सर्व उत्तरे देतील. उद्धव ठाकरेंकडे तुमचा प्रश्न गेला आहे. त्यांनी या उत्तराची तयारी केली असून तुम्हाला या संदर्भात ते लवकरच माहिती देतील, असं संजय राऊत म्हणाले.
राऊतांचं सूचक विधान
राज्यात सध्या महाविकास आघाडी एकत्रित काम करत आहे. स्थानिक स्वराज्य संस्थांचा विषय वेगळा आहे. कार्यकर्त्यांच्या काय भावना आहेत हे आम्ही तपासणार आहोत. कार्यकर्त्यांना कुणासोबत जावं वाटतं, कुठे काँग्रेस सोबत जायचं, कुठे राष्ट्रवादीसोबत जायचं आणि मुंबईत काय करायचं हे आम्ही नंतर ठरवू, असं सूचक विधान राऊत यांनी केलं आहे.
भाजपवर आरोप
यावेळी प्रभाग रचनेवरून संजय राऊत यांनी भाजपवर जोरदार हल्ला केला आहे. महापालिका निवडणुका जिंकण्यासाठी वॉर्ड फोडले जाऊ शकतात. आपल्या सोयीची वॉर्ड रचना केली जाऊ शकते. त्यामुळे आता निवडणूक आयोगाने कुणाचाही दबाव झेलू नये. त्यांनी जागल्याच्या भूमिकेत राहावं. कारण समोरच्या लोक दहशत निर्माण करू शकतात. त्यांच्याकडे प्रचंड पैसा आहे, असं राऊत यांनी म्हटलं आहे.
देऊ द्या शुभेच्छा
ठाकरे गटाकडून आदित्य ठाकरेंना वाढदिवसाच्या शुभेच्छा दिल्या जात आहेत. शुभेच्छा बॅनरवर राज ठाकरे यांचाही फोटो आहे. याकडे राऊत यांचं लक्ष वेधलं असता, देऊ द्या शुभेच्छा. शुभेच्छा देणं ही आपली परंपरा आहे. कुटुंबातील व्यक्तीला शुभेच्छा देण्यात गैर काय? त्यासाठी कुणाच्या परवानगीची गरज नाही, असंही ते म्हणाले.