नेमकं काय घडलं ?
मिळालेल्या माहितीनुसार, सुरेश विठ्ठल गवळी वय (५० वर्ष) हे सोमवारी सकाळी ९ च्या सुमारास ओमनी या चारचाकी वाहनाला पेट्रोलपंपावर पेट्रोल टाकण्यासाठी घेऊन आले होते. त्यांनी गाडीत पेट्रोल टाकले आणि तेथून निघाले. थोड्याश्या अंतरावर गेल्यानंतर त्यांना पेट्रोल पंपावरील कर्मचाऱ्यांना त्या गाडीतून धूर निघताना दिसू लागला. त्यानंतर पेट्रोल पंपावरील लोकांनी आरडा ओरडा सुरू केला. ही गोष्ट सुरेश गवळी यांच्या लक्षात येताच त्यांनी वेळीच सावधानता बाळगून बाहेर उडी मारली.
पेटत्या अवस्थेतच लोकांनी गाडीला दूर लोटले
गाडी पेटत्या अवस्थेत असताना पेट्रोल पंपावरील कर्मचारी व प्रवाशांनी तिला रस्त्याच्या कडेला नेले. त्यामुळे मोठा अनर्थ टळला. त्यानंतर ताबडतोब पेट्रोल पंपावर असणाऱ्या आपत्कालीन आग विझवण्याच्या साधनाने आग आटोक्यात आणण्याचा प्रयत्न करण्यात आला. घटनेची माहिती मिळताच खानापूर पोलीस दूरक्षेत्रचे अधिकारी घटनास्थळी धावून आले होते.
संभाजीनगरमध्येही घडली होती अशीच घटना
काही दिवसांपूर्वी छत्रपती संभाजीनगरच्या वाळूज परिसरात अशीच घटना घडली होती. बजाज ऑटो गेटसमोर एका दुचाकीमध्ये पेट्रोल भरताना आग लागली होती. दुचाकीस्वार पेट्रोल भरण्यासाठी रांगेत उभा होता. त्याला कॉल आला आणि मोबईलवर बोलायला सुरवात केली तर लगेच दुचाकीला आग लागली.
पेट्रोल पंपावर वारंवार दिल्या जातात सूचना
पेट्रोल पंपावर कोणी मोबईल वर बोलत असले तर त्या ठिकाणी असलेले कर्मचारी लगेच फोन ठेवायला सांगतात. तसेच पेट्रोल पंपावर धुम्रपान करु नका, मोबाईल फोन वापरु नका, अशी चेतावणी देणारी चिन्हेही असतात. पेट्रोल पंपावर मोबाईल न वापरण्यामागे कारण मोबाईलमधील इलेक्ट्रोमॅग्नेटिक रेडिएशन आहेत. या इलेक्ट्रोमॅग्नेटिक रेडिएशनमुळे पेट्रोलची वाफ लगेच पेट घेत असते. त्यामुळे पेट्रोलपंपाजवळ मोबईलवर बोलणे टाळावे.