राज्यात निवडणुकीच्या तोंडावर काम दाखवण्याचा प्रयत्न सुरू आहे आणि त्यातून सत्ताधारी आमदारांना मोठ्या प्रमाणात निधी दिला जाण्याच्या हलचाली सुरू आहेत. पण यासाठी निधी कुठे आहे असा सवाल रोहित पवार यांनी पोस्टमधून केला. राज्य सरकारच्या उधळपट्टीमुळे तिजोरीत खडखडाट असल्याचा आरोप त्यांनी केलाय. सार्वजनिक बांधकाम विभागाची 20 हजार कोटींची बिले अद्यापही थकीत असून बिले देत नसल्याने राज्यातील बहुतांश कामे थांबली असल्याचे पवार म्हणालेत.
पोस्टच्या अखेरीस त्यांनी यासंदर्भात राज्याची तिजोरी कुरतडणारा राज्याला हादरवून सोडणारा मोठा खुलासा येत्या दोन दिवसात करणार असल्याचे म्हटले आहे.
काय म्हणालेत रोहित पवार, एक्सवरील पोस्ट…
गेली दोन अडीच वर्षे सत्ताधाऱ्यांनी कमिशनखोरी करण्याव्यतिरिक्त कुठेही दिवे लावलेले नाहीत, त्यामुळे जनतेत सत्ताधाऱ्यांविरोधात प्रचंड रोष आहे आणि हा रोष लोकसभेलाही दिसून आला.. तसाच विधानसभेतही दिसणार आहे.
आता निवडणुका जवळ येत असल्याने आम्ही काहीतरी केले, हे कसे दाखवावे या विवंचनेतून सत्ताधारी आमदारांना येणाऱ्या अधिवेशनात भरीव निधी देण्याच्या हालचाली सुरू आहेत. पण निधी देणार कुठून? हा प्रश्न अर्थमंत्र्यांना आणि अर्थमंत्र्यांची फाईल ज्यांच्या सहिने पास होते त्या गृहमंत्र्यांना पडतो की नाही?
सरकारच्या याच उधळपट्टीमुळे राज्याच्या तिजोरीत निधीचा खडखडाट झाला असून यंदा सार्वजनिक बांधकाम विभागाची 20 हजार कोटींची बिले अद्यापही थकीत आहेत. सरकार बिले देत नसल्याने तर राज्यातली बहुतांश कामेही थांबली आहे.
अशी स्थिती असताना आणखी कमिशन खाण्यासाठी आणि पदाधिकाऱ्यांना, आमदारांना खूष करण्यासाठी नवीन कामांना निधी देण्याचा घाट घातला जात आहे का? यासाठी पुन्हा नव्याने हजारो कोटींची कर्जे काढली जातील, हे सरकार पुन्हा सत्तेत तर येणार नाही मात्र जाता जाता राज्याच्या तिजोरीची पूर्णपणे वाट लावून जाईल, हे मात्र नक्की आहे. यासंदर्भात राज्याची तिजोरी कुरतडणारा राज्याला हादरवून सोडणारा मोठा खुलासा येत्या दोन दिवसात करणार आहे!