मतमोजणीच्या दिवशी रवींद्र वायकरांचे मेहुणे मतमोजणी केंद्रावर परवानगीविना मोबाइलचा वापर करत असल्याचं आढळून आले होते. यासंदर्भात वायकर यांचे मेहुणे मंगेश पंडीलकर आणि निवडणूक आयोगाचा एनकोर ऑपरेटर दिनेश गुरव यांच्याविरोधात गुन्हा दाखल करण्यात आला होता. मात्र आता तपासात धक्कादायक माहिती समोर आली आहे. पंडीलकर हे ज्या मोबाइचा वापर करत होते तो मोबाइल ईव्हीएमशी जोडलेला असल्याचं निदर्शनास आलं आहे. याप्रकरणी अटक वॉरंट जारी करण्यात येणार असल्याची माहिती आहे.
वायकरांच्या मेहुण्यांविरोधात तक्रार
मतमोजणीच्या दिवशी रवींद्र वायकर यांचे मेहुणे पंडीलकर हे मतमोजणी केंद्रात मोबाइलचा वापर करत असल्याचा आरोप करण्यात आला होती. हिंदू समाज पक्षाचे उमेदवार भरत शाह यांनी वनराई पोलिस आणि निवडणूक निर्णय अधिकाऱ्यांकडे याची तक्रार केली होती.
शाहांनी केलेल्या तक्रारीची दखल न घेता, तहसीलदारांनी केलेल्या तक्रारीच्या आधारे पोलिसांनी एफआयआर दाखल केला आणि भरत शाहांना या प्रकरणात साक्षीदार बनवण्यात आलं आहे. इतकंच नाही तर एफआयआरची कॉपी देण्यासही नकार दिला, असा आरोप भरत शाह यांनी केला आहे.
रवींद्र वायकर ४८ मतांनी विजयी
मतमोजणीच्या दिवशी मुंबई उत्तर-पश्चिम मतदारसंघात मोठ्या नाट्यमयी घडामोडी पाहायला मिळाल्या. पहिले किर्तीकर यांना विजयी घोषित करण्यात आले. त्यानंतर फेरमतमोजणीत वायकर हे ४८ मतांनी विजयी झाल्याचं जाहीर करण्यात आलं. याविरोधात उद्धव ठाकरे गटाने न्यायालयात दाद मागितली आहे. तर आता समोर आलेल्या नव्या माहितीने रवींद्र वायकरांचे मेहुण्यांवर अटकेची टांगती तलवार आहे.