राज ठाकरे यांनी सोशल मीडिया अकाऊंट एक्सवरुन एक पोस्ट लिहिली आहे. या पोस्टमध्ये त्यांनी मनसैनिकांसाठी खास मेसेज दिला आहे. अनेक मनसैनिक माझ्या वाढदिवशी महाराष्ट्रभरातून भेटीसाठी येतात. येताना ते पुष्पगुच्छ, केक, भेटवस्तू किंवा मिठाई घेऊन येतात. मात्र यंदाच्या वर्षीपासून यापैकी काहीही आणू नका, तुमची भेट हीच माझ्यासाठी वाढदिवसाची भेट असल्याचं म्हणत राज ठाकरेंनी त्यांच्या वाढदिवशी भेटीची वेळ कळवली आहे. १४ जून रोजी सकाळी चार तास ते उपस्थित असतील असं त्यांनी आपल्या पोस्टमध्ये म्हटलं आहे.
काय आहे राज ठाकरेंची मनसैनिकांसाठी पोस्ट?
‘माझ्या महाराष्ट्र सैनिकांना,
सस्नेह जय महाराष्ट्र
दर वर्षी १४ जूनला माझ्या वाढदिवसाच्या निमित्ताने महाराष्ट्राच्या कानाकोपऱ्यातून महाराष्ट्र सैनिक मोठ्या संख्येने मला भेटायला, शुभेच्छा द्यायला येतात. त्यावेळी तुमची होणारी भेट, तुमच्याकडून मिळणाऱ्या शुभेच्छा हीच माझ्यासाठी तुमच्याकडून मिळणारी मोठी भेट असते. पण तरीही महाराष्ट्र सैनिक येताना पुष्पगुच्छ, केक, मिठाई किंवा भेटवस्तू घेऊन येतात.
पण ह्यावर्षीपासून माझी तुम्हाला मनापासून विनंती आहे की, कृपया पुष्पगुच्छ, केक, मिठाई अथवा कोणतीही भेटवस्तू आणू नका.
आपली भेट हिच माझ्यासाठी भेट आहे !
सकाळी ८:०० ते १२:०० ह्या वेळेतच मी उपस्थित असेन.
आपला नम्र
राज ठाकरे’
दरम्यान, राज ठाकरे यांनी गुढीपाडव्याच्या संध्याकाळी शिवाजी पार्कमध्ये सभा घेतली होती. या सभेत त्यांनी यंदाच्या लोकसभेसाठी पहिल्यांदा भाजपला पाठिंबा देण्याचं जाहीर केलं होतं. गुढीपाडव्यानंतर राज ठाकरे यांची कोणतीही सभा झालेली नाही. त्यामुळे आता १४ जून रोजी अनेक कार्यकर्ते, मनसैनिक त्यांच्या भेटीसाठी मुंबईत दाखल होऊ शकतात.