मुंबई शहरामध्ये १ जून ते २९ जून या कालावधीत ३२७.१ आणि उपनगरांमध्ये ३२१.७ मिलीमीटर पावसाची नोंद झाली. ठाणे जिल्ह्यात ३९३ तर पालघर जिल्ह्यात ३५८.४ मिलीमीटर पाऊस नोंदला गेला आहे. मुंबई शहर आणि उपनगरांमध्ये ३७ टक्के पावसाची तूट आहे. मात्र आता ठाणे जिल्ह्यात नऊ टक्के तर पालघर जिल्ह्यात आठ टक्के तूट आहे. भारतीय हवामान विभागाने दिलेल्या माहितीनुसार येत्या आठवड्यातही उत्तर कोकणात सर्वदूर पाऊस असल्याने या पावसाचा धरण क्षेत्राला दिलासा मिळण्याची शक्यता व्यक्त होत आहे. सध्या दक्षिण कोकणात रत्नागिरी आणि सिंधुदुर्ग जिल्ह्यात पावसाने जून महिन्याची सरासरी ओलांडली असून रायगड जिल्ह्यात सरासरीपेक्षा तीन टक्के पाऊस कमी आहे.
रविवारी आणि सोमवारी मुंबईत तुरळक ठिकाणी मुसळधार पाऊस पडू शकतो. शनिवारी मुंबईत कुलाबा येथे फारसा पाऊस पडला नाही. मात्र उपनगरांमध्ये १९ मिलीमीटर पावसाची नोंद झाली. मध्य मुंबईत काही ठिकाणी ३० मिलीमीटरपर्यंत सकाळी ८ ते सायं. ८ या दरम्यान पावसाची नोंद झाली. उत्तर मुंबईत सकाळी काही ठिकाणी पावसाचा जोर अधिक होता. मात्र काही वेळानंतर हा जोर ओसरला. ठाणे आणि पालघर जिल्ह्यात रविवार ते बुधवार तुरळक ठिकाणी मुसळधार पाऊस पडू शकतो तर रायगड, रत्नागिरीमध्ये रविवारी आणि सोमवारी तुरळक ठिकाणी अती मुसळधार पावसाचीही शक्यता आहे. सिंधुदुर्ग जिल्ह्यात सोमवारी पावसाचा वेग अधिक वाढू शकतो.
अरबी समुद्रात सौराष्ट्र आणि कच्छजवळ चक्रीय वातस्थिती निर्माण झाली आहे. तसेच केरळ आणि महाराष्ट्राच्या किनारपट्टीजवळ विरुद्ध दिशेने येणाऱ्या वाऱ्यांची प्रणालीही निर्माण झाली आहे. परिणामी कोकण आणि गोवा विभागात सर्वदूर पाऊस पडू शकतो. काही ठिकाणी मेघगर्जना आणि विजांच्या कडकडाटाचीही शक्यता आहे.