अमोल गोरगले असे हत्या झालेल्या गुन्हेगाराचं नाव आहे. याप्रकरणी पोलिसांनी माजी नगरसेवक आणि भाजपचे पदाधिकारी शेखर ओव्हाळ यांच्यासह मुन्ना उर्फ अभिषेक बाळासाहेब ओव्हाळ, रितेश रमेश ओव्हाळ , समीर शेख, महेश कदम, गणेश कदम यांच्यासह अन्य तीन साथीदारंवर गुन्हा दाखल करण्यात आला आहे. याप्रकरणी समीर उर्फ गोट्या गजानन गोरगले यांनी रावेत पोलीस स्टेशनमध्ये फिर्याद दिली आहे. पोलिसांनी शेखर ओव्हाळला ताब्यात घेतलं आहे.
पोटनिवडणुकीवेळी झालेला वाद
याबाबत पोलिसांनी दिलेली माहिती अशी की, चिंचवड विधानसभा पोटनिवडणुकीच्या वेळी अमोल गोरगले याच्यासोबत शेखर ओव्हाळ आणि त्याच्या साथीदाराचा वाद झाला होता. त्याचा राग मनात धरून सोमवारी रात्री दहाच्या सुमारास शेखर ओव्हाळ आणि त्यांच्या साथीदारांनी अमोल गारगले याच्यावर धारदार शस्त्राने वार करत त्याची हत्या केली. चिंचवड विधानसभा पोट निवडणुकीवेळी अमोल गोरगले शेखर ओव्हाळ यांच्यात वाद झाला होता. यावेळी शेखर ओव्हाळ हे राष्ट्रवादी काँग्रेसमध्ये होते. मात्र, पोटनिवडणुकीवेळी त्यांनी भाजपमध्ये प्रवेश केला होता.
गोरगले तीन महिन्यांपूर्वीच तुरुंगातून बाहेर
अमोल गोरगले यांच्यावर ओव्हाळ यांच्या हत्येचा कट रचल्याप्रकरणी गुन्हा देखील दाखल झाला होता. याप्रकरणी अमोल याला अटक देखील करण्यात आली होती. शिक्षा भोगून तीन महिन्यांपूर्वीच अमोल गोरगले हा बाहेर आला होता. त्यानंतर शेखर ओव्हाळ आणि त्यांच्या साथीदारांनी अमोल गोरगले याचा सोमवारी रात्री खून करून आपल्या रागाचा बदला घेतला आहे. या प्रकरणी अधिक तपास रावेत पोलीस करत आहे.