काय घडलं?
समील आलम (वय २०, मूळ रा. दिल्ली) असे मृत्यू झालेल्या पर्यटकाचे नाव असून, शिक्षणासाठी तो पुण्यात आला होता. मोबाइलवर ‘रील’ बघून सलीम आणि त्याचे आठ मित्र ताम्हिणी घाटात फिरायला आले होते. घाटातील मिल्कीबार धबधब्यातील जलाशयात पोहताना पाण्याचा अंदाज न आल्याने समीलचा मृत्यू झाला. रविवारी दुपारी तीनच्या सुमारास ही घटना घडली. स्थानिक पोलिस आणि मुळशी आपत्ती व्यवस्थापनाने लोणावळा येथील शिवदुर्ग बचाव पथकाशी संपर्क साधला. सायंकाळी सहाच्या सुमारास सुरू झालेली बचाव मोहीम पहाटे संपली.
मोहिमेत आदित्य पिल्लाणे, सचिन गायकवाड, आनंद गावडे, राजेंद्र कडू, सागर कुंभार, महेश मसने, योगेश उंबरे यांनी वेगवेगळ्या पातळ्यांवर मदत केली. दरीतील वाट खडतर असल्याने स्ट्रेचरला दोरी बांधून वर आणण्यात आले.
मावळ येथील वन्यजीव रक्षक संस्था, लोणावळ्यातील शिवदुर्ग मित्र, मुळशीतील आपत्ती व्यवस्थापन, माणगावमधील आपत्ती व्यवस्थापन, रायगड पोलिस आणि वन खाते यांनी ही मोहीम एकत्र राबवली.
‘मृतदेहापर्यंत पोहोचायलाही खडतर वाट’
‘ताम्हिणी घाटातील धबधब्यांच्या पाण्याचे साठे दरीत आहेत. तिथे पोहोचायच्या पायवाटा सरळ नाहीत. वाटेत दहा ते पंधरा फूट उंचीचे मोठे गुळगुळीत दगड आहेत, त्यावरून उतरणे अवघड असल्याने इतर मार्ग शोधावे लागतात. आम्ही रॅपलिंगच्या साह्याने, खडतर वाटेने मृतदेहापर्यंत पोहोचलो. स्ट्रेचरमध्ये मृतदेह ठेवून परतीचा प्रवास सुरू केला. वन विभाग, पोलिसांनीही मदत केली,’ अशी माहिती शिवदुर्ग मित्र बचाव पथकाचे सुनील गायकवाड यांनी दिली.