प्रतिनिधी, पुणे : उन्हामुळ‌े टँकरला मागणी वाढल्याने जिल्हा प्रशासनाकडून टँकर मंजुरीच्या अधिकारांचे विकेंद्रीकरण करण्यात आले आहे. टँकर मंजुरीचे अधिकार आता प्रांताधिकाऱ्यांना देण्यात आले आहेत. यामुळे वाडा-वस्त्यांमध्ये टँकर लवकर पोहोचणार आहेत.
जिल्ह्यातील दहा तालुक्यांत २२९ टँकर सुरू आहेत. मे अखेरपर्यंत आणखी टँकर वाढण्याची शक्यता आहे. टँकरची मागणी झाल्यानंतर प्रक्रियेमध्ये वेळ जात असल्याने तातडीने टँकर उपलब्ध करून देण्यासाठी विकेंद्रीकरणाचा निर्णय घेण्यात आला आहे. गेल्या वर्षी उन्हाळ्यात पाणीटंचाईमुळे जिल्ह्याच्या ग्रामीण भागात टँकर सुरू झाले. उन्हाळा संपून पावसाळा सुरू झाल्यानंतर कमी पावसामुळे टँकर सुरूच राहिले.
गेल्या वर्षी उन्हाळ्यात सुरू झालेले टँकर अद्यापही सुरूच आहेत. पाणीटंचाईमुळे यंदा टँकरची संख्या वाढली आहे. टँकर मंजुरीच्या विकेंद्रीकरणामुळे खेड्यापाड्यात, वाड्या-वस्त्यांमधून टँकरची मागणी झाल्यास ते तातडीने उपलब्ध करून देता येतील, असे ‘रोहयो’च्या उपजिल्हाधिकारी दीप्ती सूर्यवंशी यांनी सांगितले.