पुणे लोकसभा मतदारसंघात भारतीय जनता पक्षाचे मुरलीधर मोहोळ आणि काँग्रेसचे रवींद्र धंगेकर यांच्यात लढत होत आहे. याशिवाय वंचित बहुजन आघाडीकडून वसंत मोरे आणि ‘एमआयएम’कडून अनिस सुंडके रिंगणात आहेत. ही लढत चौरंगी असली, तरी ती प्रत्यक्षात मोहोळ विरुद्ध धंगेकर अशीच असल्याने कमालीची चुरस निर्माण झाली आहे.
शिरूर लोकसभा मतदारसंघात राष्ट्रवादी काँग्रेस (शरदचंद्र पवार) पक्षाचे डॉ. अमोल कोल्हे आणि राष्ट्रवादी काँग्रेसचे शिवाजीराव आढळराव पाटील यांच्यात थेट लढत होत आहे. वंचित बहुजन आघाडीकडून प्राचार्य डॉ. आफताब शेख यांना उमेदवारी देण्यात आली आहे. पुण्याप्रमाणे येथेही दोन प्रमुख उमेदवारांमध्येच थेट लढत होत आहे. मावळ लोकसभा मतदारसंघात शिवसेनेचे खासदार श्रीरंग बारणे यांची प्रतिष्ठा पणाला लागली आहे. त्यांच्यासमोर शिवसेना उद्धव बाळासाहेब ठाकरे पक्षाचे संजोग वाघेरे यांनी आव्हान निर्माण केले आहे.
पुणे, शिरूर आणि मावळची निवडणूक महायुती आणि महाविकास आघाडीसाठी प्रतिष्ठेची झाली आहे. पुणे आणि मावळ ही जागा राखण्याचे आव्हान महायुतीपुढे आहे; तर शिरूरची जागा राखण्याचे आव्हान शरद पवार यांच्या राष्ट्रवादीपुढे आहे. शिरूरची लढत बारामतीप्रमाणे ‘साहेब विरुद्ध दादा’ अशी झाली आहे. बारामती येथे सात मे रोजी मतदान झाले आहे.
पुणे, शिरूर आणि मावळ येथील मतदानासाठी जिल्हा प्रशासन आणि निवडणूक आयोगाने सर्व तयारी केली आहे. संवेदनशील मतदान केंद्रांवर पोलिसांचा कडेकोट बंदोबस्त तैनात करण्यात येणार आहे.