काँग्रेसचा बालेकिल्ला अशी पुणे लोकसभा मतदारसंघाची जुनी ओळख होती. मात्र, २०१४ आणि २०१९ या दोन्ही वर्षी पुण्यातून भाजपचे उमेदवार विक्रमी मतांनी विजयी झाले आहेत. त्यामुळे यंदा भाजप या मतदारसंघात हॅटट्रिक करू इच्छित आहे, तर काँग्रेस आपल्या जुन्या बालेकिल्ल्यावर पुन्हा एकदा कब्जा करण्यासाठी प्रयत्नशील आहे. यासाठी दोन्ही पक्षांनी खास निरीक्षक नेमले असून, यात प्रामुख्याने विदर्भातील नेत्यांचा समावेश आहे.
काँग्रेसने बहुचचर्चित कसबा पेठ पोटनिवडणुकीत विजय खेचून आणलेल्या रवींद्र धंगेकर यांना रिंगणात उतरवले आहे. मात्र, काँग्रेस पक्षच गटातटात विभागलेला आहे. पक्षातील गटबाजी आणि व्यक्तिगत हेवेदावे यामुळे पक्ष अजूनही एकसंधपणे प्रचारात उतरल्याचे चित्र नाही.
काँग्रेसकडून केदार, ठाकूर समन्वयक
पुण्यासह राज्यात काँग्रेसला पोषक वातावरण निर्माण झालेले असतानाच केवळ पक्षातील अंतर्गत गटबाजीमुळे जागा हातची जाऊ नये, यासाठी पक्षाने विदर्भातील सहा आमदारांची निरीक्षक म्हणून फिल्डिंग लावली आहे. त्यांच्यावर विदर्भातीलच माजी मंत्री सुनील केदार आणि यशोमती ठाकूर यांची समन्वयक म्हणून नियुक्ती करण्यात आली आहे. कोण काम करते, कोण नाही; तसेच कोणामुळे पक्षाला फटका बसण्याची शक्यता आहे, कुठे काय कमतरता आहे, याचा रोजचा अहवाल ते पक्षश्रेष्ठींना देत आहेत. त्यामुळे काँग्रेसमधील सर्वांनाच आपली सक्रियता दाखवून द्यावी लागत असल्याचे चित्र आहे.
फडणवीसांचे विशेष लक्ष
दुसरीकडे मूळचे नागपूरकर असलेले उपमुख्यमंत्री देवेंद्र फडणवीस यांचे पुण्याच्या जागेकडे विशेष लक्ष आहे. फडणवीस यांचे विश्वासू अशी ओळख असलेले माजी महापौर मुरलीधर मोहोळ यांना भाजपने पुण्यात उमेदवारी दिली आहे. पालिकेत पाच वर्षे सत्तेत राहिलेल्या भाजपकडे सुमारे १०० माजी नगरसेवकांची फौज आहे. याशिवाय पक्षाकडे पुणे लोकसभेत स्वतःचे चार, मित्रपक्षाचा एक आमदार असून, राज्यसभेची खासदारकीही पक्षाकडे आहे. असे असले, तरी काही आमदार आणि माजी नगरसेवक प्रचारात सक्रिय नसल्याचे चित्र होते. त्यामुळे फडणवीसांना पुण्यात येऊन त्यांची शाळा घ्यावी लागली. प्रचारात सक्रिय न झाल्यास पुन्हा तिकीट मिळणार नाही, अशी तंबीही द्यावी लागली. असे असले, तरी अजून काही जण प्रचारात सक्रिय नसल्याचे चित्र आहे.
भाजपकडून संदीप जोशी
देवेंद्र फडणवीस यांनी त्यांचे अतिशय विश्वासू नागपूरचे माजी महापौर संदीप जोशी यांनी पुण्यात निरीक्षक म्हणून पाठवले आहे. ते पक्षाच्या दररोजच्या कामाचा रिपोर्ट थेट देवेंद्र फडणवीसांकडे देत आहेत. त्यामुळे भाजपचे पदाधिकारी, माजी नगरसेवक धास्तावले आहेत. गुरुवारी पुण्यात आलेल्या फडणवीसांनी पुन्हा पुण्याचा आढावा घेतला आहे, तर काँग्रेसचे प्रदेशाध्यक्ष नाना पटोलेही पुण्यात येऊन परिस्थितीचा आढावा घेऊन संबंधितांची कानउघाडणी करणार आहेत. त्यामुळे पुण्यातील रंगतदार लढतीवर आता विदर्भाची बारीक नजर असल्याचे स्पष्ट झाले आहे.