प्रतिनिधी, पुणे : दुचाकीवरून चाललेल्या सनदी लेखापाल (सीए) तरुणाचा अज्ञात वाहनाच्या धडकेत गंभीर जखमी होऊन मृत्यू झाला. स्वारगेट येथील ग्रेड सेपरेटरमध्ये मंगळवारी सकाळी साडेअकराच्या सुमारास हा अपघात झाला. सागर सुरेश मंत्री (वय ३४, रा. अक्षर अल्टोरिअस पार्क, हडपसर) असे मृत तरुणाचे नाव आहे.या प्रकरणी सागरचा भाऊ आशिष याने तक्रार दिली आहे. त्यावरून स्वारगेट पोलिस ठाण्यात अज्ञात वाहनचालकावर गुन्हा दाखल करण्यात आला आहे. सागर आणि आशिष हे दोघेही सीए आहेत. पोलिसांनी दिलेल्या माहितीनुसार, ग्रेड सेपरेटरमध्ये सकाळी साडेअकराच्या सुमारास अपघात झाल्याची माहिती मिळाली. प्रत्यक्ष घटनास्थळी स्वारगेट वाहतूक विभागाचे पोलिस दाखल झाले होते. त्यांनी सागरला तातडीने डेक्कन परिसरातील एका खासगी रुग्णालयात दाखल केले. तेथे डॉक्टरांनी त्याचा मृत्यू झाल्याचे जाहीर केले. तेथून शवविच्छेदनासाठी मृतदेह ससून रुग्णालयात पाठविण्यात आला. सागरचे भवानी पेठ परिसरात ऑफिस आहे. तो सीए फर्म चालवित होता. तो नेहमीप्रमाणे हडपसर येथून ऑफिसला जात असताना हा अपघात झाला. सागरच्या डोक्याला मोठ्या प्रमाणावर मार लागला होता. त्यामुळे रक्तस्राव झाला होता. त्याच्या दुचाकीचे मागील बाजूने मोठ्या प्रमाणावर नुकसान झाले आहे. त्यामुळे दुचाकीला मागूल जोरदार धडक बसल्याचा अंदाज पोलिसांनी व्यक्त केला आहे.
Baramati Crime: बायकोला पळवून नेली, म्हणून पळवून नेणाऱ्याच्या भावाला पतीने पळवले; प्रेमाच्या त्रिकोणात 14 वर्षाचा भाऊ ‘असा’ अडकला
सहा महिन्यांच्या मुलीचे छत्र हरपले
सागर हा मूळचा नगर येथील आहे. तो व्यवसायानिमित्त पुण्यात स्थायिक झाला होता. त्याच्या पश्चात आई, वडील, पत्नी, लहान मुलगी आणि भाऊ असा परिवार आहे. सागरला सहा महिन्यांची मुलगी असून, या अपघातामुळे तिचे वडिलांचे छत्र हरपले आहे.
सलग दुसऱ्या दिवशी ‘हिट अँड रन’
रविवारी मध्यरात्री बोपोडी परिसर आणि पिंपळे सौदागर येथे भरधाव वाहनाच्या धडकेत दोन पोलिस कर्मचाऱ्यांचा मृत्यू झाल्याची घटना घडली. त्यानंतर सलग दुसऱ्या दिवशी शहरात ‘हिट अँड रन’चा प्रकार घडला. त्यामुळे या प्रकाराला चाप लावण्यासाठी आणि बेशिस्त वाहनचालकांना अद्दल घडविण्यासाठी कठोर पावले उचलण्याची मागणी पुणेकरांकडून केली जात आहे.
ग्रेड सेपरेटरमध्ये ‘सीसीटीव्ही’ कॅमेरे नाहीत, त्यामुळे अपघात नेमका कसा झाला, त्याची माहिती मिळालेली नाही. मात्र, ग्रेड सेपरेटरच्या दोन्ही बाजूला उपलब्ध असलेल्या ‘सीसीटीव्हीं’चे फुटेज तपासासाठी ताब्यात घेण्यात आले असून, त्याद्वारे तपास केला जात आहे.
– आश्विनी बावचे, सहायक निरीक्षक, स्वारगेट पोलिस ठाणे
