नफा मिळवून देण्याच्या आमिषाने फसवणूक
शेअर बाजारात चांगला नफा मिळवून देण्याच्या आमिषाने नरवीर तानाजी मालुसे रस्ता (सिंहगड रस्ता) परिसरात राहणाऱ्या एका महिलेची २८ लाख ५१ हजार रुपयांची फसवणूक केल्याचा प्रकार समोर आला आहे. या प्रकरणी ४८ वर्षीय महिलेने पर्वती पोलिस ठाण्यात तक्रार दिली आहे. ही घटना १३ ते १७ जानेवारी २०२४ या काळात घडली. सायबर चोरट्यांनी तक्रारदार महिलेशी व्हॉट्सअपवर संपर्क करून शेअर ट्रेडिंगमधून चांगला नफा मिळवून देण्याचे आमिष दाखवले. त्यानंतर तक्रारदार महिलेला वेगवेगळ्या बँक खात्यांत २८ लाख ५१ हजार रुपये पाठवायला सांगितले. मात्र, त्यानंतर महिलेला कोणत्याची प्रकारचा परतावा दिला नाही. त्यामुळे फसवणूक झाल्याचे निदर्शनास येताच महिलेने पोलिसांत धाव घेतली. या प्रकरणाचा तपास वरिष्ठ निरीक्षक नंदकुमार गायकवाड करीत आहेत.
अर्ध वेळ नोकरीच्या आमिषाने गंडा
आदिनाथ सोसायटीत राहणाऱ्या ४४ वर्षीय महिलेला अर्ध वेळ नोकरीचे आमिष दाखवून सायबर चोरट्याने २४ लाख ३५ हजार ९७९ रुपयांचा गंडा घातला केली. या प्रकरणी महिलेने स्वारगेट पोलिस ठाण्यात तक्रार दिली आहे. ही घटना आठ फेब्रुवारी ते १६ मे या काळात घडली. पोलिसांनी दिलेल्या माहितीनुसार, सायबर चोरट्याने तक्रारदार महिलेशी संपर्क केला. त्याचा ‘थ्रीफ्टी कंपनीचा कार रेंटल बुकिंग’चा व्यवसाय असून, बुकिंगला सकारात्मक प्रतिसाद देण्याचे काम असल्याचे सांगितले. त्यातून महिलेला भरपूर पैसे मिळतील, असे सांगितले. त्यानंतर सायबर चोरट्याने तक्रारदार महिलेला सुरुवातील काही रक्कम पाठवून विश्वास संपादित केला. त्यानंतर वेगवेगळी आमिषे दाखवून महिलेला बँक खात्यात २४ लाख ३५ हजार ९७९ पाठवायला लावले.
पोलिस बोलत असल्याचे सांगून फसवणूक
‘तुमच्या नावाने अनधिकृत पार्सल पाठवण्यात येत आहे. त्या प्रकरणात पोलिस कारवाईतून वाचण्यासाठी दोन लाख रुपये पाठवा,’ असे सांगून तरुणीची फसवणूक केल्याचा प्रकार समोर आला आहे. या प्रकरणी उंड्री येथे राहणाऱ्या २८ वर्षीय तरुणीने कोंढवा पोलिस ठाण्यात तक्रार दिली आहे. ही घटना ३० एप्रिल ते १६ मे या दरम्यानच्या काळात घडली आहे. पोलिसांनी दिलेल्या माहितीनुसार, सायबर चोरट्याने तो अंधेरी पोलिस ठाण्यातील अधिकारी बोलत असल्याचे सांगितले. त्याने व्हिडिओ कॉल करून महिलेशी संवाद साधून कारवाईची भीती घातली.