चाकण ‘एमआयडीसी’मध्ये दीड हजार लहान-मोठ्या कंपन्या असून, लाखो कामगार येथे काम करतात. दर वर्षी हजारो कोटी रुपयांचा महसूल ‘एमआयडीसी’च्या माध्यमातून सरकारला मिळतो. चाकण एमआयडीसीमध्ये रस्ते, वाहतूक कोंडी, प्रदूषण, सांडपाणी व्यवस्था, विजेचा लपंडाव अशा समस्या अनेक दिवसांपासून आहेत. सध्या या समस्यांपेक्षाही स्थानिक गुंड, स्वयंघोषित राजकीय पदाधिकारी यांच्याकडून कंपनीच्या मालकांकडे सर्रास खंडणी मागण्याचे प्रकार घडत आहेत. कंपनीतील कच्चा माल आमच्याकडून घेणे, कंपनीत तयार होणारे ‘स्क्रॅप’ आम्हालाच मिळायला हवे, अशी मागणी हे गुंड करत असतात. त्याचप्रमाणे आमच्या एजन्सीचे कर्मचारीच कंपनीत कामाला घ्या, कंपनीचे ‘टेंडर’ आम्हालाच द्या, अशी मागणीही आता होऊ लागली आहे. याविषयी अनेकदा ‘फेडरेशन ऑफ चाकण इंडस्ट्री’ने आवाज उठविला आहे. पिंपरी-चिंचवड पोलिस आयुक्तांनीही या प्रकरणात लक्ष घालून तक्रार करण्याच्या सूचना केल्या होत्या. मात्र, कंपनी मालकांना याच भागात व्यवसाय करायचा असल्याने; तसेच स्थानिक गुंडांची भीती वाटत असल्याने, कोणीही तक्रार देण्यासाठी पुढे येत नाही. कंपनीसाठी लागणाऱ्या विविध परवानग्या सरकारी अधिकाऱ्यांकडून घ्याव्या लागतात. यातील अनेक अधिकारी प्रत्येक कामासाठी कंपनीच्या मालकांकडून पैशांची मागणी करतात.
येथे करा तक्रार…
वाढता भ्रष्टाचार आणि खंडणीखोरीच्या प्रकारांना आळा घालण्यासाठी चाकण ‘एमआयडीसीती’ल कंपनी मालकांनी थेट केंद्रीय अन्वेषण ब्यूरोच्या (सीबीआय)अधिकाऱ्यांची भेट घेतली. चाकण एमआयडीसीमध्ये कशा प्रकारे भ्रष्टाचार सुरू आहे, स्थानिक गुंड कसे त्रास देतात, याबाबतची सविस्तर माहिती त्यांनी या वेळी दिली. पोलिसांकडे गेल्यानंतर हे गुंड कसे खुन्नस ठेवतात, याबाबत त्यांना सांगितले. त्यावर, कोणताही गुंड, शासकीय अथवा खासगी व्यक्ती पैशांची मागणी करीत असेल, तर ९१७५०२२५५० या क्रमांकार तक्रार करावी. जो व्यक्ती तक्रार करील, त्याचे नाव गुप्त ठेवण्यात येईल. मात्र, संबंधित व्यक्तीवर कारवाई होईल, असे अधिकाऱ्यांनी सांगितले.
चाकण ‘एमआयडीसी’मधील अनेक कंपन्यांच्या मालकांकडे पैशांची मागणी करण्यात आली आहे. वेगवेगळी कारणे सांगून पैसे उकळले जातात. हा प्रकार म्हणजे खंडणीच आहे. त्याचप्रमाणे काही लोक कंपन्यांना माल घेण्यावरून; तसेच स्क्रॅप देण्यावरूनही दबाव टाकत असतात. केवळ भीतीमुळे कोणी पुढे येऊन तक्रार देत नाहीत.- दिलीप बटवाल, सचिव, फेडरेशन ऑफ चाकण इंडस्ट्री
पैसे मागण्याचे ‘मार्ग’
– अन्नदानासाठी देणगी द्या.
– एखाद्या कार्यक्रमासाठी मोठी वर्गणी द्या.
– समाजकार्यासाठी पैसे द्या.
– सढळ हाताने मदत करा.
पोलिसांकडून सातत्याने चाकण ‘एमआयडीसी’तील कंपन्यांना भेट दिली जाते. त्यांच्या समस्या जाणून घेतल्या जातात. जर कोणी पैशांची मागणी, दमबाजी, गुंडगिरी करत असले तर, फक्त तोंडी कळविले तरी कारवाई केली जाते. पोलिसांकडून स्वत:हून कंपन्यांशी समन्वय साधला जात आहे. कंपनी मालकांनी मनात कोणतीही भीती न बाळगता आपल्या बरोबर होणाऱ्या गैरप्रकाराची माहिती पोलिसांना द्यावी.- राजेंद्र गौर, सहायक पोलिस आयुक्त, चाकण विभाग
‘हजारांमध्ये रक्कम मागतात’
‘खंडणी स्वरूपात थेट पैशांची मागणी माझ्याकडे झाली नाही. मात्र, वर्गणी, देणगी, फंड यासाठी वारंवार काही कार्यकर्ते येतात. काही हजारांमध्ये हे लोक रक्कम घेऊन जातात. कंपनीमध्ये आल्यानंतर पैसे घेतल्याशिवाय हे लोक जात नाहीत. चाकण, निघोज या परिसरातील काही कंपनी मालक आहेत. हे मालक गाववाले असल्याने त्यांना हे कार्यकर्ते त्रास देत नाहीत. मात्र, बाहेरील उद्योजकाला हे लोक नेहमीच त्रास देतात,’ असे एका कंपनी मालकाने नाव न छापण्याच्या अटीवर सांगितले.