राज्यातील आणि राज्याबाहेरील महत्त्वांच्या महानगरांमध्ये मुद्रित माध्यमांद्वारे प्रसिद्धीकरिता ४० कोटी रुपयांची अंदाजित तरतूद करण्यात आली आहे. जुलै २०२४ ते मार्च २०२५ या कालावधीत हा निधी वापरता येणार आहे.
याशिवाय, इलेक्ट्रॉनिक माध्यमांद्वारे प्रसिद्धीच्या माध्यमातून दूरदर्शन, आकाशवाणी वाहिन्या, खासगी एफएम रेडियो, स्थानिक केबल वाहिन्या, चित्रपटगृहे, रेल्वे स्थानकांवरून ऑडिओद्वारे प्रसिद्धी आणि सुपर मार्केटमध्ये ऑडिओद्वारे होणारी प्रसिद्धी या सर्व माध्यमातून होणाऱ्या प्रसिद्धीसाठी ३९ कोटी ७० लाख रुपयांच्या अंदाजित रक्कमेला मान्यता देण्यात आली आहे. तर बाह्य माध्यमांद्वारे प्रसिद्धी म्हणजेच खासगी होर्डिंग, डिजिटल फ्लेक्स बॅनर आणि एसटी बस, विमानतळ, टॅक्सी, वॉल पेटिंग, रेल्वे रॅप आणि पॅनल व बॅक पॅनल यासाठी १६५ कोटी ३५ लाख रुपयांच्या निधीला मान्यता देण्यात आली आहे.
कोणत्या योजनांची होणार प्रसिद्धी?
मुख्यमंत्री-माझी लाडकी बहीण, शासकीय दस्तावेजांमध्ये आईच्या नावाचा समावेश, शुभमंगल सामूहिक विवाह योजनेस वाढववेले अनुदान, मुख्यमंत्री अन्नपूर्ण योजना, लखपती दीदी, पुण्याश्लोक अहिल्यादेवी होळकर महिला स्टार्ट अप योजना, मुलींना मोफत व्यावसायिक उच्च शिक्षण, कृषी शेतकरीविमा, पायाभूत सुविधा, सागरी किनारा मार्ग, अटल सेतू, मुंबई-पुणे महामार्ग, मराठी भाषा विद्यापीठ, नमो शेतकरी महासन्मान योजना, दुग्ध योजना, सिंचन, महाआवास योजना, रोजगार हमी योजना आणि ग्रामीण जीवनोन्नती अभियान, सागरी सुरक्षा या योजना लोकांपर्यंत पोहोचवण्यात येणार आहेत.