पप्पांनी आईला मारुन खोलीत ठेवलं, चिमुकल्या शिवमचं ऐकून काका घामाघूम; सांगलीतील थरारक घटना

प्राजक्ता मंगेश कांबळे (वय २८) असे मृत महिलेचे नाव आहे. तर मंगेश चंद्रकांत कांबळे (रा. मांगले, मुळ रा. कोकरूड) असे पतीचे नाव आहे. मंगेशचा भाऊ निलेश आणि त्याची आई गेल्या पंधरा वर्षापासून मांगले येथे वास्तव्यास आहे. मांगले वारणानगर रस्त्यावर ज्योतिबा मंदिराच्या समोर रामचंद्र वाघ यांच्या कौलारू घरात ते भाड्याने राहत आहेत. गेल्या चार दिवसापूर्वी मंगेश, त्याची पत्नी प्राजक्ता व सहा वर्षांचा मुलगा शिवम, तीन वर्षांची मुलगी शिवन्या मुंबईहून आई आणि भावाकडे रहायला आले होते.

मंगेश आणि प्राजक्ता गुरुवारी सकाळी भाऊ निलेश आणि आई देववाडी येथे गेले होते. सकाळी दहाच्या दरम्यान पती-पत्नीत वाद झाला होता. तो वाद विकोपाला जाऊन मंगेशने प्राजक्ताचा ओढणीने गळा आवळून खून केला. त्यानंतर त्याने मृतदेह बाजूच्या खोलीत ठेवलेल्या विद्युत पंपाच्या मोडक्या पेटीत घालून झाकून ठेवला. खोलीला बाहेरून कुलूप लावून, भाऊ निलेश याला फोन करून मी शिराळ्याला जाणार आहे. गाडी घेऊन ये असा निरोप दिला.
Bengaluru Crime News: मी गौरीचा जीव घेतलाय, राकेशचा सासू-सासऱ्यांना फोन, पुणेकर महिलेसोबत बंगळुरुत भयंकर घडलं
त्यानंतर निलेश देववाडीतून मांगलेत आल्यानंतर मंगेशने भावाकडून गाडी घेऊन तो शिराळ्याकडे निघून गेला. याच दरम्यान मंगेशचा सहा वर्षांचा मुलगा शिवम दारात रडत होता. त्यावेळी निलेशने त्याला काय झाले विचारले. तेव्हा त्याने सांगितलं की, मम्मी-पप्पाचे दोघांचे भांडण होऊन पप्पांनी आईला मारून खोलीत ठेवलं. निलेशने देववाडी येथील येथील बहिणीला आणि तिच्या पतीला बोलवून घेतले. मंगेशला फोन करून गोरक्षनाथ मंदिराजवळच थांब आम्ही येतो म्हणून सांगितले. त्यानंतर गोरक्षनाथ मंदिराजवळ जावून सविस्तर माहिती विचारल्यानंतर त्याने खून केल्याचे सांगितले.

त्यानंतर या तिघांनीही त्याला आम्हाला त्रास होईल तू पोलीस स्टेशनला जाऊन माहिती दे, असे सांगितले. त्यानंतर तो स्वतः शिराळा पोलिसात हजर झाला. दरम्यान, दुपारनंतर घटनेची माहिती मिळाल्यावर वाघ यांच्या घरासमोर लोकांनी गर्दी केली होती. शिराळा पोलिसांनी मयत प्राजक्ताच्या आईला आणि इतर नातेवाईकांना घटनेची माहिती दिली. शिराळा पोलीस ठाण्यात प्राजक्ताची आई रजनी जाधव यांनी फिर्याद दिली आहे. अधिक तपास शिराळा पोलीस ठाण्याचे निरीक्षक सिद्धेश्वर जंगम करीत आहेत.