गेल्या १० वर्षांमधील हा जुलैमधील सांताक्रूझ केंद्रावरील दुसऱ्या क्रमांकाचा विक्रमी पाऊस होता. मुंबईत रविवारी रात्रीनंतर सोमवार सकाळपर्यंत कुलाबा येथे १०० मिलीमीटरहून कमी पाऊस झाला, तर दिवसभरात याची कसर भरून काढत सोमवारी सकाळी ८.३० ते सायं. ५.३० पर्यंत १०२ मिलीमीटर पाऊस नोंदला गेला. सांताक्रूझ येथे सोमवारी सकाळपर्यंत २६८ मिलीमीटर पाऊस पडला. गेल्या १० वर्षांमधील हा जुलैमधील सांताक्रूझ केंद्रावरील दुसऱ्या क्रमांकाचा विक्रमी पाऊस होता. याआधी सन २०१९मध्ये २४ तासांमध्ये ३७५ मिलीमीटर पाऊस नोंदला गेला होता. रात्रभर पडलेल्या पावसानंतर दिवसभरात मात्र उपनगरात पावसाचा जोर कमी होता. त्यामुळे दिवसभरात केवळ १४ मिलीमीटर पावसाची नोंद सांताक्रूझ येथे झाली.
शनिवारपर्यंत दक्षिण कोकण ते केरळपर्यंत सक्रीय असलेली किनारपट्टीवरील द्रोणीय स्थिती रविवारी गुजरातपासून केरळपर्यंत सक्रीय झाली. रविवारी रात्री रायगड येथील ढगांचा पुंजका मुंबईपर्यंत आला आणि या ढगांमुळे पावसाची तीव्रता वाढली. काही वेळा एखाद्या प्रणालीमुळे पावसाचा जोर वाढू शकतो याचा अंदाज येतो; मात्र या पावसाची तीव्रता किती असेल ते कळत नाही, अशी माहिती प्रादेशिक हवामान विभाग अधिकाऱ्यांकडून देण्यात आली. उपग्रह किंवा रडार या दोन्हींच्या माध्यमातून त्याच्या तीव्रतेचा अंदाज आला नाही, असेही या अधिकाऱ्यांनी सांगितले.
मुंबईत काही ठिकाणी १५० ते २०० मिलीमीटर, तर तुरळक ठिकाणी २०० मिलीमीटरहून अधिक पाऊस अवघ्या काही तासांमध्ये झाला आणि ठिकठिकाणी पाणी साचून नागरिकांची तारांबळ उडाली. अवघ्या सहा तासांमध्ये पडलेल्या पावसामुळे आता मुंबई शहरामध्ये १ जूनपासून ७०३.२ मिलीमीटर पावसाची नोंद झाली आहे.