प्रतिनिधी, मुंबई : स्थानिक पर्यावरणासाठी साह्यभूत ठरतील अशा झाडांच्या संगोपनासाठी मुंबईकरांकडून विविध प्रयत्न करण्यात येत आहेत. देशी झाडांचे बीजसंकलन करून येत्या पावसाळ्यात विविध संस्था, विद्यार्थ्यांपर्यंत या बिया पाठवण्यात येणार आहेत. ‘हरियाली’ संस्थेच्या मुलुंड विभागातर्फे १० हजार आंब्याची रोपे तयार करण्याचा उपक्रम हाती घेण्यात आला आहे. तसेच विलेपार्ले येथील म. ल. डहाणूकर कॉमर्स कॉलेजच्या राष्ट्रीय सेवा योजनेतर्फे ‘आम खास है २.०’ या उपक्रमाअंतर्गत आंब्यांचे बीज शेतकऱ्यांपर्यंत पोहोचवण्यात येणार आहे.अक्षय्य तृतीयेच्या मुहूर्तावर ‘हरियाली’ संस्थेच्या मुलुंड विभागाने आंब्याच्या कोयी जमा करण्याच्या प्रकल्पाला सुरुवात केली. समाज माध्यमामध्ये या प्रकल्पाची चर्चा झाल्यानंतर, अनेक नागरिकांनी कोयी आणून संस्थेकडे सोपवल्या. मुलुंडच्या आयटीआयमध्ये हा प्रकल्प राबवण्यात येत असून तिथे तयार केलेल्या माती आणि पालापाचोळ्यावर ५०० कोयी पसरून प्रातिनिधिक स्वरूपात या प्रकल्पाला सुरुवात करण्यात आली. प्रकल्पप्रमुख सतीश आठल्ये, ‘हरियाली’चे स्वयंसेवक, आयटीआयचे प्राचार्य गोरे, उपप्राचार्य परदेशी आदी यावेळी उपस्थित होते. या प्रकल्पासाठी आणखी कोयी आवश्यक असून नागरिकांनी आंब्याच्या कोयी स्वच्छ धुवून, वाळून आणून द्याव्यात, असे आवाहन संस्थेतर्फे करण्यात आले आहे.
Cyber Crime : शेअर बाजारात गुंतवणुकीचे आमिष पडले महागात, सायबर चोरट्यांकडून महिलेला ४० लाखांचा गंडा
या माध्यमातून तयार झालेली रोपे मोठ्या पिशवीत पाच-सहा फुटांची होईपर्यंय नर्सरीत वाढवण्यात येतील. त्यानंतर काही रोपे ‘हरियाली’च्या वनप्रकल्पात लावण्यात येतील. तसेच काही रोपे काही गावांमधील शाळांना आणि संगोपन करण्यास तयार असलेल्या जबाबदार नागरिकांना देण्यात येणार आहे. कोयी देण्यासाठी मुरार रोड नर्सरी, कालिदास नाट्यगृहामागे, मुलुंड पश्चिम येथे किंवा द्वारका, पुष्पधन्वा सो., मेहुल सिनेमासमोर, मालवीय रोड, मुलुंड पश्चिम किंवा आयटीआय संस्था, खंडोबा मंदिरसमोर, मुलुंड पूर्व येथे संपर्क साधावा, असे आवाहन करण्यात आले आहे.
विलेपार्ले येथे संकलन
डहाणूकर कॉलेजमध्ये आंब्याच्या कोयी गोळा करून ‘मिशन ग्रीन मुंबई’च्या माध्यमातून शेतकऱ्यांना पोहोचवण्यात येणार आहे. आंब्याच्या कोयी स्वच्छ करून, सुकवून विलेपार्ले पूर्व येथील डहाणूकर कॉलेजमध्ये एनएसएस कक्ष, तिसरा मजला येथे पोहोचवता येतील. गेल्या वर्षी सात हजारांहून अधिक कोयी विद्यार्थ्यांनी गोळा केल्या होत्या. संपर्क ९३२६६८२१०५, ८०१०३०८०७६.
