हार्बर लाईनवर लोकलसेवा विस्कळीत
पावसामुळे हार्बर मार्गावरील सीएसएमटी ते वाशी ची लोकलसेवा ठप्प झाली होती. त्यामुळे पनवेल ते वाशीदरम्यान रेल्वे धावत होत्या. यासोबतच ठाण्याहून सीएसएमटीकडे येणारी जलद मार्गिका देखील बंद होती. त्यामुळे मुख्य मार्गिकेवर प्रवास करणाऱ्या प्रवाशांना हार्बरलाईनहून वाशी ते ठाणे आणि मग ठाणे ते सीएसएमटी असा पर्याय अवलंबावा लागला. दरम्यान ट्रान्सहार्बर मार्गिकेवर देखील लोकल १५ ते २० मिनिटं विलंबाने धावत होत्या.
पावसाचा जोर कमी, मध्य रेल्वेचे सुधारित परिपत्रक जाहीर
मध्य रेल्वेच्या जलद मार्गिकेवरील रेल्वेसेवा ठप्प झाल्याने प्रवाशांना मनस्ताप सहन करावा लागला. धीम्या मार्गावरील लोकल देखील १५ ते २० मिनिट विलंबाने धावत असल्याने रेल्वे स्थानकांवर अलोट गर्दी पाहायला मिळाली. पावसाचा जोर दुपारच्या वेळी कमी झाल्याने पाण्याचा निचरा होत आहे. या पार्श्वभूमीवर मध्ये रेल्वेने सुधारित परिपत्रक जाहीर केले आहे. रेल्वेसेवा हळूहळू पूर्वपदावर येत असल्याचे परिपत्रकात नमूद करण्यात आले आहे.
Mumbai Rain Update: मुंबईत पावसाचं थैमान; रस्ते जलमय, लोकलसेवाही ठप्प, मुंबईकरांना कार्यालय गाठणे कठीण
सुधारित परिपत्रकानुसार
- हार्बरलाईनची लोकलसेवा आता सुरु झाली आहे. चुनाभट्टी रेल्वे स्थानकात पाणी भरल्याने सीएसएमटी ते मानखुर्द रेल्वेसेवा विस्कळीत झाली होती. पावसाचा जोर कमी झाल्याने हार्बरलाईनवरील रेल्वेसेवा आता पूर्ववत झाली आहे. तर सीएसएमटी ते गोरेगाव ही रेल्वेसेवा देखील सुरु आहे
- ठाण्याहून सीएसएमटीकडे येणारी जलद मार्गिका पावसामुळे खंडित झाली होती. तर सध्या सीएसएमटी-ठाणे दरम्यान डाऊन आणि अप फास्ट मार्गावर प्रतिबंधित वेगाने लोकलसेवा सुरु आहे.