एसटी महामंडळाने एक जानेवारीपासून ऑनलाइन आरक्षण प्रणाली अद्ययावत केली. त्यामुळे आधीच्या तुलनेत नव्या यंत्रणेत पैसे जाऊन तिकीट न येणे, तिकीट आरक्षित न होणे, आसन क्रमांक न दिसणे अशा तक्रारी कमी झाल्या आहेत. परिणामी ऑनलाइन आरक्षणाने प्रवास करण्याकडे प्रवाशांचा कल वाढता आहे.
‘एक जानेवारी ते २० मेदरम्यान १२ लाख ९२ हजार प्रवाशांनी ऑनलाइन माध्यमाने तिकीट आरक्षण करून प्रवास केला. गेल्या वर्षी याच कालावधीत नऊ लाख ७५ हजार प्रवाशांनी असा प्रवास केला होता. यंत्रणेत बदल केल्याने गेल्या वर्षीच्या तुलनेत यंदा तीन लाख १७ हजार प्रवाशांची वाढ झाली. सध्या रोज सरासरी १० हजार प्रवासी ऑनलाइन तिकीट आरक्षित करत आहेत,’ असे एसटी महामंडळातील अधिकाऱ्यांनी सांगितले.
मे महिना संपत आल्याने आता प्रवाशांचा परतीचा प्रवास सुरू होणार आहे. महिन्याचा शेवटचा आठवडा आणि जूनच्या पहिल्या आठवड्यात मुंबईकडे येणाऱ्या गाड्यांमध्ये प्रवासी गर्दी वाढती राहणार आहे. ऑनलाइन आणि स्थानक-आगारातील आरक्षण केंद्रांवर अशा दोन्ही ठिकाणी अमृत ज्येष्ठ नागरिक, जेष्ठ नागरिक, महिला सन्मान योजना, दिव्यांग व्यक्ती अशा प्रवाशांना सवलतीनुसार आरक्षण करता येते. प्रवाशांनी गैरसोय टाळण्यासाठी ऑनलाइन आरक्षण करूनच प्रवास करावा, असे आवाहन एसटी महामंडळाने केले आहे.
ऑनलाइन आरक्षणासाठी
प्रवाशांना घरबसल्या एसटीचे तिकीट उपलब्ध करून देण्यासाठी महामंडळाने npublic.msrtcors.com ही अधिकृत वेबसाइट सुरू केली आहे. MSRTC Bus Reservation या मोबाइल अॅपवरूनही प्रवाशांना आरक्षण करता येणार आहे.
इथे करा तक्रार…
ऑनलाइन तिकीट आरक्षण करताना तांत्रिक अडचण आल्यास ७७३८०८७१०३ या क्रमांकावर संपर्क साधावा. हा क्रमांक २४ तास सुरू राहणार आहे. ऑनलाइन आरक्षण करताना पैसे भरण्याबाबत आणि खात्यातून पैसे वजा होऊन तिकीट न मिळाल्यास (पेमेंट गेट वे संदर्भात) ०१२०-४४५६४५६ या क्रमांकावर संपर्क साधावा, असे महामंडळाने म्हटले आहे.