महाराष्ट्रात विधानसभा निवडणूकीत महायुतीला आश्चर्यकाररित्या प्रचंड मते पडून त्यांचा मोठा विजय झाला आहे. तर महाविकास आघाडीला पन्नासपेक्षाही कमी जागा मिळाल्या आहेत. तर मनसेचा या निवडणूकीत एकही आमदार निवडून न आल्याने मनसे पक्षाच्या नेत्यांची शिवतीर्थ येथे चिंतन बैठक बोलावण्यात आली होती. या बैठकीत मनसेचे अध्यक्ष राज ठाकरे यांच्या समोर मनसेच्या नेत्यांनी आपली भूमिका मांडली आहे. या चिंतन बैठकीत राज ठाकरे यांना आपण महायुती जायला हवे अशी मागणी पक्षाच्या नेत्यांनी केल्याची माहिती उघडकील आली आहे.
राज्यात महायुतीचे सरकार येणार असून मुख्यमंत्री देवेंद्र फडणवीस असतील आणि आपण महायुती सरकारमध्ये असू असे मनसे नेते राज ठाकरे यांनी जाहीर केले होते. परंतू प्रत्यक्षात 23 तारखेला झालेल्या मतदान मोजणी राज ठाकरे यांच्या पक्षाला एक जागा जिंकता आलेली नाही. या पार्श्वभूमीवर राज ठाकरे यांच्या निवासस्थानी दादरच्या शिवतीर्थ येथे मनसेच्या नेत्यांची चिंतन बैठक सोमवारी आयोजित करण्यात आली होती. या बैठकीत मनसेच्या नेत्यांनी राज ठाकरे यांना आपण युतीत जायला हवे असा प्रस्ताव मांडला. आपण महायुतीत थेट सामील नसल्याने आपल्याला मतदानात महायुतीच्या नेत्यांनी सहकार्य केले नाही. जर आपण महायुतीत थेट सामील असतो तर चित्र वेगळे असते असे मनसेच्या नेत्यांनी राज ठाकरे यांना सांगितले. राज ठाकरे यांनी मनसेच्या नेत्यांचे सगळे म्हणणे ऐकून घेतल्याची माहिती सूत्रांनी दिली आहे.
मनसेची अवस्था
एकीकडे विधानसभा निवडणूकीत महायुतीला भरभरुन मतदान मिळालेले असताना मनसेला आपला भोपळाही फोडता आलेला नाही. त्यातच माहीम येथून राज ठाकरे यांचे पूत्र अमित ठाकरे यांचाही पराभव झाल्याने मनसेच्या गोटात चिंतेचे वातावरण आहे. या विधानसभेच्या निवडणूक निकालांना मनसेचे निवडणूक चिन्ह आणि पक्षाची मान्यताही धोक्यात आलेली आहे. मनसेने यंदा 125 जागा लढविल्या होत्या. परंतू मनसेला अवघा 1.8 टक्के मते मिळालेली आहेत.