‘महारेरा’च्या कारवाईमुळे बांधकाम पूर्ततेचे नियम धाब्यावर बसविण्यात पुण्यातील विकासकच आघाडीवर असल्याचे चित्र दिसत आहे. या स्थगित गृहप्रकल्पांची यादी ‘महारेरा’च्या संकेतस्थळावर उपलब्ध असून, त्यामध्ये गुंतवणूक करताना ग्राहकांनी काळजी घ्यावी, असे आवाहन ‘महारेरा’ने केले आहे.
राज्यातील विकासकांना आपल्या गृहप्रकल्पांची नोंदणी ‘महारेरा’कडे करणे बंधनकारक आहे. या नोंदणी क्रमांकासाठी अर्ज करताना विकासकाला आपला गृहप्रकल्प प्रत्यक्षात कधी पूर्ण होणार याची तारीख स्पष्टपणे नोंदवावी लागते. गृहप्रकल्प पूर्ण करण्यासाठी ही ‘डेडलाइन’ पाळावी लागते. प्रकल्प पूर्ततेनंतर महापालिकेकडून मिळणारे भोगवटा प्रमाणपत्र म्हणजे प्रपत्र चार सादर करावे लागते. गृहप्रकल्प अपूर्ण असल्यास ‘महारेरा’कडून काही महिन्यांची मुदतवाढ घ्यावी लागते किंवा प्रकल्पाच्या पूर्ततेत अडचणी येत असल्यास गृहप्रकल्पाची नोंदणी रद्द करण्यासाठी अर्ज करावा लागतो. बांधकाम पूर्ततेची तारीख उलटल्यावर अपूर्ण गृहप्रकल्पाला ‘लॅप्स’ यादीत टाकून त्याची नोंदणी स्थगित करण्याची कारवाई केली जाते. अशा प्रकल्पाचे बँक खाते सील केले जाते; तसेच या गृहप्रकल्पाची जाहिरात, मार्केटिंग, त्यातील सदनिकांच्या विक्री व नोंदणीवर बंदी घातली जाते.
आणखी ११३७ प्रकल्पांवर कारवाई
बांधकाम वेळेत पूर्ण न केलेल्या; तसेच प्रकल्प पूर्ततेसाठी मुदतवाढ न घेतलेल्या राज्यातील १७५० ‘लॅप्स’ गृहप्रकल्पांची नोंदणी स्थगित करण्यात आली आहे. ‘महारेरा’च्या या नियमाचा भंग केल्याबद्दल आणखी ११३७ प्रकल्पांवर कारवाईचा बडगा ‘महारेरा’ने उगारला असून, त्यांचीही नोंदणी स्थगित करण्याची कारवाई सुरू केली आहे.
या प्रकल्पांची नोंदणी रद्द
पुणे विभाग : ६२८
(पुणे जिल्हा – ४६२, कोल्हापूर – ३६, सांगली – २७, सोलापूर – २४, सातारा – ७९)
कोकण : ७६०
(मुंबई शहर – ४८, मुंबई उपनगर – ११५, ठाणे – १८२, पालघर – ९९, रायगड – २१६, रत्नागिरी – ७७, सिंधुदुर्ग – २३)
उत्तर महाराष्ट्र : १३५
(नाशिक – ८७, नगर – ३२, जळगाव – १०, धुळे – ३, नंदुरबार – ३)
विदर्भ : ११०
(नागपूर – ५०, अमरावती – २४, भंडारा – २, चंद्रपूर – ९, गडचिरोली – १, वर्धा – ७, अकोला – ८, बुलडाणा – ३, यवतमाळ – ६)
मराठवाडा : १००
(संभाजीनगर – ६६, बीड – १३, जालना – ७, लातूर – ५, परभणी – ५, नांदेड – ३ , हिंगोली – १)
दादरा नगर हवेली : १३
दमण : ३
पुण्यात या भागातील गृहप्रकल्प अपूर्ण
सोमवार पेठ, गुलटेकडी, बिबवेवाडी, धनकवडी, कर्वे रस्ता, शिवणे, लोहगाव, वडगाव शेरी, बाणेर, वाकड, हिंजवडी, पिंपळे निलख, आकुर्डी, निगडी, मोशी, चऱ्होली, तळेगाव दाभाडे, वाघोली, कोंढवा, वढु बुद्रुक, सासवड, देहू रोड, कारले (राजगड), बारामती, दौंड, नारायणगाव.
साडेसहा हजार प्रकल्पांना कारणे दाखवा नोटीस
‘महारेरा’ने राज्यातील सर्व गृहप्रकल्पांचा आढावा घेऊन ‘डेडलाइन’ चुकविलेल्या ६६३८ प्रकल्पांना तीस दिवसांची ‘कारणे दाखवा’ नोटीस बजावली होती. त्यापैकी ३७५१ प्रकल्पांपैकी काही प्रकल्पांच्या पूर्णतेचे प्रपत्र चार महारेरा संकेतस्थळावर अद्ययावत करण्यात आले, तर काही प्रकल्पांनी ‘महारेरा’ नोंदणीच्या नूतनीकरणासाठी अर्ज केले आहेत, काही विकासकांनी प्रकल्प रद्द करण्यासाठी प्रस्ताव सादर केले.
घरखरेदी करणाऱ्या ग्राहकाची फसवणूक होऊ नये, यासाठी ‘महारेरा’ दक्ष आहे. ‘महारेरा’कडे नोंदविलेल्या प्रत्येक गृहप्रकल्पाची सद्यस्थिती ही आमच्या संकेतस्थळावर अद्ययावत दिसली पाहिजे, त्यासाठी प्रत्येक प्रकल्पाचा अनुपालन अहवाल योग्य कालावधीत सादर व्हायलाच हवा, त्यासाठी ‘महारेरा’ आग्रही आहे.- अजोय मेहता, अध्यक्ष, महारेरा