दिवसभरात वाढली टँकरची संख्या
राज्यात मंगळवारपर्यंत विविध ठिकाणी एकूण तीन हजार ६२२ टँकरनी पाणीपुरवठा करण्यात आला होता. हा आकडा दिवसभरात ३६ टँकरने वाढून थेट तीन हजार ६५८वर पोहोचला. राज्यभरात बुधवारी तीन हजार ६५८ टँकरने पाणीपुरवठा करण्यात आला. यामध्ये तीन हजार ५६३ खासगी, तर ९५ सरकारी टँकरचा समावेश होता. तब्बल सात हजार ६२३ वाड्या आणि दोन हजार ९४९ गावांमध्ये टँकरने पाणीपुरवठा सुरू असल्याची माहिती समोर आली आहे.
‘सरकारने दुष्काळाकडे लक्ष द्यावे’
मुंबई : ‘संपूर्ण राज्य दुष्काळाने बेजार आहे. बहुतांश भागांत भीषण टंचाई आहे. राज्यातील लोकसभा निवडणूक संपली असल्याने राज्य सरकारने आता दुष्काळाकडे गांभीर्याने लक्ष द्यावे’, असे मागणी महाराष्ट्र प्रदेश काँग्रेसचे प्रदेशाध्यक्ष नाना पटोले यांनी बुधवारी केली. ‘धरणातील पाणीसाठा जेमतेम असून हजारो गावे, वाड्या व वस्त्यांना पिण्याचे पाणी मिळत नाही. पाणीटंचाई असलेल्या प्रत्येक गावखेड्यात पाणी मिळावे, तसेच जनावरांना चारा उपलब्ध व्हावा, यासाठी आचारसंहिता शिथिल करून तातडीने उपाययोजना करण्यात याव्यात’, असेही त्यांनी नमूद केले.
नाशकात अघोषित पाणीबाणी
नाशिक : नाशिक शहरासाठी गंगापूर, मुकणे आणि दारणा धरणातील पाणी आरक्षण आणि ३१ जुलैपर्यंत पाणीपुरवठा करण्याचा ताळमेळ जमत नसल्यामुळे प्रशासनाने अखेर अघोषित पाणाकपातीला सुरुवात केली आहे. तिन्ही धरणांत शहरासाठी एक हजार ९१ दशलक्ष घनफूट पाणी आरक्षण शिल्लक असून, ते १२ जुलैपर्यंतच पुरणार आहे. त्यामुळे १८ दिवसांची तूट भरून काढताना नागरिकांचा रोष होऊ नये यासाठी पाणीपुरवठा विभागाने दुरुस्तीची कामे काढून कपातीचा अनोखा मार्ग शोधला आहे. त्यानुसार जलवाहिन्यांची दुरुस्ती आणि व्हॉल्व्ह बदलण्यासाठी शनिवारी संपूर्ण दिवसाचा पाणीपुरवठा बंद राहणार आहे, तर रविवारी सकाळी पाणीपुरवठा बंद राहणार आहे. यामुळे शहरवासीयांना पाणीबाणीला सामोरे जावे लागणार आहे.