मध्य रेल्वेच्या मुंब्रा रेल्वे स्थानकाजवळ सोमवारी सकाळी लोकलच्या दारात उभं राहून प्रवास करणारे 13 प्रवासी खाली पडले. या अपघातात चार प्रवाशांचा मृत्यू झाला, तर नऊ जण जखमी झाले. या घटनेनंतर रेल्वेनं खबरदारी म्हणून वळण मार्गावर वेग कमी केला आहे. असं असलं तरी असंख्य रेल्वे प्रवासी अजूनही फूटबोर्डवर उभं राहून प्रवास करताना दिसले. अपघात नेमका कसा झाला, हे अस्पष्ट असतानाच मुंबईतील सर्वच लोकलचे दरवाजे स्वयंचलित करण्याचा निर्णय रेल्वे प्रशासनाने घेतला. अपघातात जखमी झालेल्या चार रुग्णांवर कळव्यातील छत्रपती शिवाजी महाराज रुग्णालयात सर्जरी होणार आहे. नऊ जणांवर कळव्यातील छत्रपती शिवाजी महाराज, ठाण्यातील सिव्हिल रुग्णालय आणि ज्युपिटर रुग्णालयात उपचार सुरू आहेत. आज कळवा रुग्णालयात असलेल्या सात जखमींपैकी चार जखमींवर शस्त्रक्रिया होणार असून यासाठी 16 डॉक्टरांची टीम तैनात करण्यात आल्याची माहिती हॉस्पिटल प्रशासनाकडून मिळत आहे. तर उर्वरित जखमींना सूज असल्याने ती सूज उतरल्यानंतर त्यांच्यावर देखील शस्त्रक्रिया करणार असल्याची माहिती देखील डॉक्टरांकडून मिळत आहे. यासह राज्यातल्या, देशभरातल्या सामाजिक, राजकीय, क्रीडा व इतर विषयातील महत्वाच्या बातम्या व अपडेट्स जाणून घेण्यासाठी दिवसभर हा ब्लॉग फॉलो करत रहा.
Maharashtra Breaking News LIVE 10 June 2025 : मुंब्रा रेल्वे अपघातातील जखमींवर सर्जरी करण्यासाठी 16 डॉक्टरांची टीम
